21 студзеня, Мінск /Уладзімір Мацвееў - БЕЛТА/. Беларусь і ў далейшым будзе прытрымлівацца шматвектарнай палітыкі. Аб гэтым на ўрачыстым сходзе з нагоды 100-годдзя беларускай дыпламатычнай службы заявіў міністр замежных спраў Уладзімір Макей, перадае карэспандэнт БЕЛТА.
"Кіраўніком нашай дзяржавы ставяцца перад намі новыя амбіцыйныя задачы, якія дыктуе сам час. Беларусь як самастойная, незалежная еўрапейская дзяржава будзе і далей праводзіць шматвектарную знешнюю палітыку, не гандлюючы сваім суверэнітэтам у залежнасці ад тых або іншых кан'юнктурных меркаванняў", - заявіў міністр.
Паводле яго слоў, будзе прадоўжаны курс на паглыбленне і развіццё адносін з Расіяй і іншымі партнёрамі на еўразійскай прасторы. Беларусь таксама разлічвае на сур'ёзныя дывідэнды ад выраўноўвання і вывядзення на належны ўзровень кантактаў і дыялогу з Еўрасаюзам і ЗША, мае намер умацоўваць адносіны ўсебаковага супрацоўніцтва і стратэгічнага партнёрства з Кітаем, пашыраць беларускую прысутнасць у іншых дзяржавах Азіі. Будзе прадоўжана карпатлівая работа з краінамі Блізкага Усходу, Афрыкі і Лацінскай Амерыкі. "Добры задзел ёсць на ўсіх напрамках. Трэба прыкласці максімум намаганняў, каб яго рэалізаваць", - сказаў міністр.
Уладзімір Макей адзначыў, што Беларуссю выбудаваны канструктыўныя палітычныя і ўзаемавыгадныя эканамічныя адносіны з большасцю краін свету на ўсіх кантынентах. Будучы невялікай па сусветных мерках дзяржавай, Беларусь прадаўжае генерыраваць і развіваць міжнародныя ініцыятывы, якія набываюць прызнанне і падтрымку сусветнай супольнасці. "Разам з чарнобыльскай і раззбраенчай тэматыкай, якія развіваліся нашай краінай яшчэ ў савецкі перыяд і на заранку незалежнасці, на сучасным этапе Беларусь вядома свету ідэямі, сфармуляванымі Прэзідэнтам нашай краіны, аб прызнанні разнастайнасці шляхоў прагрэсіўнага развіцця ў якасці каштоўнасці чалавечай цывілізацыі, аб процідзеянні гандлю людзьмі, пашырэнні інтарэсаў краін з сярэднім узроўнем даходу, падтрымцы традыцыйнай сям'і, пабудове партнёрстваў дзеля дасягнення Мэт устойлівага развіцця", - заявіў кіраўнік беларускага знешнепалітычнага ведамства.
Агульнапрызнана таксама роля Беларусі як донара еўрапейскай - і не толькі - бяспекі. "Па меры таго, як ускладняецца сітуацыя ў гэтай сферы, у нашых партнёраў мацнее адчуванне своечасовасці і мэтазгоднасці ініцыятывы кіраўніка нашай дзяржавы аднавіць шырокі дыялог аб умацаванні міжнароднай бяспекі - новага "Хельсінкскага працэсу". Беларусь ведаюць як міжнародную пляцоўку, дзе ў розных фарматах абмяркоўваюцца вельмі складаныя рэгіянальныя і глабальныя праблемы з удзелам нават адкрыта канфліктуючых бакоў. І не толькі абмяркоўваюцца, але і выпрацоўваюцца шляхі іх вырашэння", - адзначыў міністр.
Ён звярнуў увагу, што, выступаючы на міжнародных пляцоўках з аб'яднаўчымі ініцыятывамі, Беларусь як ініцыятар, актыўны ўдзельнік і ў пэўным сэнсе драйвер чатырох інтэграцыйных праектаў на еўразійскай прасторы - СНД, Саюзнай дзяржавы, ЕАЭС і АДКБ - кіруецца ідэяй Прэзідэнта Беларусі аб інтэграцыі інтэграцый. "Так, сёння гэтыя аб'яднання не пазбаўлены ўнутраных праблем. У той жа час яны маюць сур'ёзны патэнцыял з пункту гледжання ўмацавання і развіцця прагматычных гандлёва-эканамічных, абаронных, навуковых і культурных сувязей. Сёння прадметна абмяркоўваюцца падыходы да спалучэння інтэграцый па лініі ЕАЭС-ЕС , ЕАЭС-ШАС, ЕАЭС - Эканамічны пояс Шаўковага шляху, ЕАЭС - краіны АСЕАН", - канстатаваў Уладзімір Макей.
Паводле яго слоў, эканамічнае вымярэнне дыпламатыі, уклад у прасоўванне экспарту, асваенне новых рынкаў заўсёды з'яўляліся і застаюцца асноўнымі крытэрыямі ацэнкі эфектыўнасці беларускай дыпслужбы. Планамерная дыверсіфікацыя экспарту пры захаванні і ўмацаванні пазіцый на традыцыйных рынках - адна з ключавых мэт эканамічнай палітыкі Беларусі.
У сваім выступленні міністр падрабязна спыніўся на асноўных вехах станаўлення беларускай дыпламатычнай службы, гісторыя якой пачалася 22 студзеня 1919 года. Аднак вытокі беларускай дыпламатыі ідуць у значна больш далёкае мінулае, таму што знешнія сувязі беларускія землі ўжо мелі ў перыяд Полацкага княства. "Асаблівай увагі заслугоўвае эпоха Вялікага Княства Літоўскага. Многія нашы суайчыннікі знаходзіліся на дыпламатычнай службе такіх дзяржаў, як Рэч Паспалітая, Расійская імперыя", - адзначыў міністр.
Кіраўнік МЗС падкрэсліў, што ў сваёй сучаснай гісторыі дыпламатычная служба не раз даказвала ўменне працаваць прафесіянальна, вырашаць задачы любой складанасці, паспяхова адстойваць інтарэсы краіны і дабівацца пастаўленых мэт на перадавой барацьбы за незалежнасць і суверэнітэт Беларусі. Прыкладамі для пераймання і для цяперашняга пакалення дыпламатаў служаць першыя беларускія міністры замежных спраў: Кузьма Кісялёў, Анатоль Гурыновіч, іншыя вядомыя прадстаўнікі і заслужаныя ветэраны дыпламатычнай службы. Вялікім дыпламатам савецкай эпохі называюць Андрэя Грамыку, які нарадзіўся на Гомельшчыне, 110-гадовы юбілей з дня нараджэння якога будзе адзначацца ў гэтым годзе. На працягу 28 гадоў ён нязменна быў міністрам замежных спраў СССР. Амаль такі ж тэрмін, 26 гадоў, пасольствамі СССР у Польшчы, Францыі, ГДР, Японіі кіраваў беларус Пётр Абрасімаў. "І гэты спіс можна было б яшчэ доўга працягваць. Мы заўсёды будзем ганарыцца гэтымі людзьмі!" - сказаў Уладзімір Макей.
Ён адзначыў, што заснаванне кіраўніком беларускай дзяржавы геральдычных сімвалаў знешнепалітычнага ведамства, Дня дыпламатычнага работніка, юбілейнага медаля "100 год дыпламатычнай службе Беларусi" з'яўляецца сведчаннем прызнання важнасці прафесіі дыпламата, укладу дыпслужбы ў рэалізацыю знешнепалітычных і знешнеэканамічных інтарэсаў Рэспублікі Беларусь. "Гэта знак высокага даверу да нас з боку кіраўніцтва дзяржавы, і мы павінны апраўдаць аказаны давер сваёй працай і эфектыўнай рэалізацыяй задач, пастаўленых Прэзідэнтам нашай краіны!" - дадаў міністр.
За шматгадовую плённую працу, значны ўклад у развіццё і ўдасканаленне знешнепалітычнай і знешнеэканамічнай дзейнасці, умацаванне пазіцый Рэспублікі Беларусь на міжнароднай арэне Уладзімір Макей ўзнагародзіў Пятра Краўчанку, Уладзіміра Сянько, Івана Антановіча, Урала Латыпава, Міхаіла Хвастова і Сяргея Мартынава, якія кіравалі МЗС у перыяд незалежнасці краіны, медалём "100 год дыпламатычнай службе Беларусі".-0-
