20 мая, Мінск /Аліна Грышкевіч - БЕЛТА/. Любыя шматбаковыя антыкрызісныя ініцыятывы павінны мець узгоднены характар і не закранаць аспекты нацыянальнага суверэнітэту. Такое меркаванне выказаў міністр замежных спраў Расіі Сяргей Лаўроў сёння на анлайн-канферэнцыі высокага ўзроўню "Выкарыстанне патэнцыялу міжрэгіянальнай інтэграцыі для дасягнення Мэт устойлівага развіцця", арганізатарамі якой з'яўляюцца Беларусь, Барбадас і канферэнцыя ААН па гандлі і развіцці (ЮНКТАД), паведамляе карэспандэнт БЕЛТА.
"Свет стаіць перад мноствам выклікаў. Негатыўнае ўздзеянне пандэміі каранавіруса на глабальную палітыка-сацыяльную сітуацыю пагаршаецца палітычнымі фактарамі - ростам канфрантацыі, цэнтрабежнымі тэндэнцыямі шматбаковага гандлю, злоўжываннем пратэкцыянісцкімі мерамі, прымяненнем нелігітымных аднабаковых абмежаванняў, - адзначыў Сяргей Лаўроў. - Адбываецца эскалацыя розных супярэчнасцей паміж дзяржавамі, што пагражае самымі сур'ёзнымі наступствамі для сусветнай эканомікі. Мы з'яўляемся сведкамі фрагментацыі і разбурэння існуючых трансгранічных ланцужкоў кааперацыйных сувязей".
Ён звярнуў увагу, што наносіцца ўрон дабрабыту грамадзян, падрываюцца перспектывы глабальнага перспектыўнага росту, а значыць - магчымасці эфектыўнай рэалізацыі задач, прадугледжаных у тым ліку парадкам дня ў галіне ўстойлівага развіцця.
На думку расійскага міністра, выбар пляцоўкі ЮНКТАД для абмеркавання гэтых вострых пытанняў уяўляецца апраўданым. "Актуальнасць такога мерапрыемства прадыктавана падрыхтоўкай маючай адбыцца міністэрскай канферэнцыі ЮНКТАД, у ліку адной з найважнейшых задач якой бачыцца фарміраванне шырокага аб'яднальнага глабальнага парадку дня па пытаннях гандлю і развіцця на бліжэйшую перспектыву, - сказаў ён. - Мы перакананы, што толькі дакладнае прытрымліванне ўзгодненых у рамках Сусветнай гандлёвай арганізацыі шматбаковых гандлёвых правіл, адмова ад пратэкцыянісцкіх мер, максімальна шырокі ўлік калектыўных інтарэсаў дасць магчымасць сусветнай супольнасці эфектыўна змагацца з глабальнымі пагрозамі".
"Пры гэтым любыя шматбаковыя антыкрызісныя ініцыятывы павінны мець узгоднены характар і не закранаць аспекты нацыянальнага суверэнітэту, рэалізоўвацца пры каардынуючай ролі ААН, - упэўнены міністр замежных спраў. - Расія падтрымлівае рэалізацыю Парадку дня-2030, прыняцце якога стала магчымым дзякуючы праяўленай краінамі прыхільнасці да шматбаковага супрацоўніцтва, прынцыпаў раўнапраўя, агульнай адказнасці і салідарнасці".
У мінулым годзе Расія прадставіла добраахвотны нацыянальны агляд дасягненняў МУР, у якім змешчаны звесткі аб асноўных дасягненнях у эканамічнай, сацыяльнай і прыродаахоўнай сферах за першую пяцігодку з моманту ўзгаднення глабальных мэт. "Расія таксама ўносіць уклад у рэалізацыю Парадку дня-2030 праз аказанне фінансавай і тэхнічнай дапамогі зацікаўленым краінам, штогадовы аб'ём якой перасягае $1 млрд. Прыярытэтнымі атрымальнікамі расійскай дапамогі з'яўляюцца дзяржавы СНД. З улікам узрастаючай колькасці рэгіянальных і інтэграцыйных аб'яднанняў і павышэння іх вагі ў сусветнай палітыцы важным уяўляецца наладжванне механізма каардынацыі і абмену вопытам", - выказаў меркаванне кіраўнік расійскага МЗС.
Інтэграцыйныя аб'яднанні маюць магутны рэсурс рэалізацыі МУР для пераадолення негатыўных наступстваў пандэміі, хутчэйшага посткавіднага аднаўлення сусветнай эканомікі.
"Наладжванне міжрэгіянальнага дыялогу ўяўляецца канструктыўным крокам, які перашкаджае блокаваму процістаянню і дае магчымасць эфектыўна змагацца з перакосамі ў частцы злоўжывання аднабаковымі абмежавальнымі мерамі і так званым правам моцнага, - прадоўжыў Сяргей Лаўроў. - У сувязі з гэтым мы лічым своечасовай ініцыятыву нашых беларускіх і барбадоскіх партнёраў па запуску дыялогавага механізма паміж інтэграцыйнымі аб'яднаннямі і падключэнні да гэтага працэсу ЮНКТАД. Гэта цалкам адпавядае мандату канферэнцыі, чый аўтарытэтны экспертны патэнцыял уяўляецца вельмі запатрабаваным у кантэксце задач па павышэнні ролі рэгіянальных эканамічных сувязей у глабальных умовах па рэалізацыі Мэт устойлівага развіцця".
"Значнай рухаючай сілай у забеспячэнні ўстойлівага і інклюзіўнага эканамічнага росту для нашай краіны з'яўляецца рэгіянальная інтэграцыя, у першую чаргу ў рамках Еўразійскага эканамічнага саюза, - канстатаваў міністр. - Адной з асноўных яго мэт з'яўляецца стварэнне ўмоў для стабільнага развіцця эканомік дзяржаў-членаў у інтарэсах павышэння жыццёвага ўзроўню іх насельніцтва. Мы назіраем паскарэнне тэмпаў дасягнення МУР краінамі Еўразійскага эканамічнага саюза ў галінах, аднесеных да сферы кампетэнцыі наднацыянальных органаў саюза. Агульны рынак у перамяшчэнні тавараў, паслуг, капіталу і рабочай сілы прадастаўляе краінам бясспрэчныя канкурэнтныя перавагі на шляху дасягнення такіх Мэт устойлівага развіцця, як поўнае выкараненне беднасці, забеспячэнне харчовай бяспекі, устойлівы эканамічны рост, усёахопная індустрыялізацыя".
