29 верасня, Мінск /Кар. БЕЛТА/. У складаных знешнепалітычных умовах СНД прадаўжае выконваць свае функцыі па абароне суверэнітэту, забеспячэнні ўмоў для мірнага і стабільнага развіцця дзяржаў - удзельніц, заявіў генеральны сакратар СНД Сяргей Лебедзеў у час пасяджэння Савета міністраў абароны дзяржаў - удзельніц СНД у Туле. Аб гэтым БЕЛТА паведамілі ў прэс-службе Выканкама СНД.
"Гэта пасяджэнне Савета міністраў абароны СНД праходзіць на фоне сур'ёзных перамен, звязаных з дынамічным змяненнем сусветнага геапалітычнага ландшафту і фарміраваннем шматпалярнай сістэмы міжнародных адносін. У розных рэгіёнах планеты зніжаецца дамінаванне ЗША і так званага калектыўнага Захаду. Відавочным сведчаннем фарміравання новага балансу сіл, заснаванага на агульнапрызнанных нормах міжнароднага права, сталі вынікі XV саміту БРІКС, праведзенага ў мінулым месяцы ў ПАР. У той жа час заходняя гегемонія ў адказ на злом аднапалярнага свету прадаўжае правакаваць лакальныя войны, раздзімае ачагі застарэлых канфліктаў і стварае новыя", - сказаў Сяргей Лебедзеў.
Паводле яго слоў, дзяржавы СНД робяць практычныя крокі для ўмацавання стабільнасці і бяспекі. "У складаных знешнепалітычных умовах наша Садружнасць прадаўжае выконваць свае функцыі па абароне суверэнітэту, забеспячэнні ўмоў для мірнага і стабільнага развіцця дзяржаў-удзельніц. У ходзе рэгулярных сустрэч кіраўнікі нашых краін адкрыта абменьваюцца думкамі па сітуацыі ў СНД і вакол Садружнасці, а таксама абмяркоўваюць сумесныя меры рэагавання на палітычныя і эканамічныя выклікі і пагрозы, - адзначыў генсакратар СНД. - Дзяржавы Садружнасці падзяляюць і падтрымліваюць прынцыпы глабальнай бяспекі, стараюцца зладжана процідзейнічаць санкцыйнаму націску, лічаць мэтазгодным прытрымлівацца прынцыпаў дыялогу, партнёрства і ўзаемнай выгады, нарошчваюць усебаковае ўзаемадзеянне як з традыцыйнымі партнёрамі, так і з усімі, хто выступае за фарміраванне незалежных цэнтраў сілы ў шматпалярным свеце".
"З улікам таго, што спектр пагроз ваеннай бяспецы дзяржаў - удзельніц СНД застаецца даволі шырокім, узаемадзеянне ў ваеннай сферы, безумоўна, з'яўляецца надзейным стабілізуючым фактарам. Дзейнасць Савета міністраў абароны і яго каардынацыйных камітэтаў у цяперашніх умовах набывае асаблівую значнасць. Апошнім часам важнае значэнне таксама набываюць рабочыя сустрэчы і сумесныя пасяджэнні Савета міністраў абароны дзяржаў СНД, АДКБ і ШАС. На іх шырока абмяркоўваюцца пытанні глабальнага і рэгіянальнага парадку дня, меры па забеспячэнні ваеннай бяспекі дзяржаў, а таксама далейшага супрацоўніцтва ў ваеннай сферы", - дадаў Сяргей Лебедзеў.
Генеральны сакратар СНД адзначыў, што ў наступным годзе старшынства ў Садружнасці Незалежных Дзяржаў пяройдзе да Расійскай Федэрацыі. Цяпер завяршаецца падрыхтоўка Канцэпцыі старшынства Расіі ў 2024 годзе і плана мерапрыемстваў па яе рэалізацыі.
"Улічваючы негатыўнае развіццё падзей у свеце, сёння вельмі важна захаваць адзінства дзяржаў - удзельніц Садружнасці ў адстойванні агульных інтарэсаў і гатоўнасць прыняцця сумесных папераджальных мер", - дадаў генеральны сакратар.-0-
