5 чэрвеня, Мінск /Уладзімір Мацвееў - БЕЛТА/. Роля і месца Мінска як перагаворнай пляцоўкі ў рабоце трохбаковай кантактнай групы мае каласальнае значэнне. Аб гэтым сёння на сустрэчы з Прэзідэнтам Беларусі Аляксандрам Лукашэнкам заявіў прадстаўнік Украіны ў ТКГ Леанід Кучма, перадае карэспандэнт БЕЛТА.
"Роля і месца Мінска ў рабоце трохбаковай кантактнай групы мае каласальнае значэнне. Вы, напэўна, добра ведаеце, што чуліся многія галасы, што трэба некуды перанесці. Гэта поўны абсурд, які не мае пад сабой ніякіх падстаў. Мінск выбраны, гэта адзінае месца, дзе можна праводзіць нармальны дыялог. А з улікам таго, як ставіцца ўлада Беларусі да гэтых працэсаў, дык удвайне", - падкрэсліў Леанід Кучма.
"Для мяне асабіста заўсёды радасць быць у Мінску, у вашай цудоўнай краіне, сустракацца з Прэзідэнтам, да якога я стаўлюся з вялікай павагай", - сказаў ён.
Леанід Кучма выказаў упэўненасць, што гісторыя і заўтрашні дзень сведчаць аб неабходнасці сумеснага вырашэння тых праблем, якія цяпер ёсць ва Украіне. "І мы ў гэтым разлічваем і на дапамогу персанальна Прэзідэнта, і Беларусі", - адзначыў прадстаўнік Украіны.-0-