6 верасня, Мінск /Кар. БЕЛТА/. Намеснік міністра замежных спраў Беларусі Алег Краўчанка 5-6 верасня наведаў Швейцарыю з рабочым візітам, паведамілі БЕЛТА ў прэс-службе МЗС.
Алег Краўчанка прыняў удзел у міжнароднай канферэнцыі высокага ўзроўню па тэматыцы еўрапейскай бяспекі "Круглы стол Шамбезі" (горад Гліён над Мантро). Намеснік міністра прадставіў асноўныя падыходы і ініцыятывы Беларусі ў гэтай сферы, уключаючы ініцыяваны краінай запуск шырокага міжнароднага дыялогу па пытаннях бяспекі.
Ён таксама правёў сустрэчу з намеснікам дзяржаўнага сакратара ў Федэральным дэпартаменце замежных спраў Швейцарыі Крысцінай Марці Ланг. Бакі абмеркавалі асноўныя напрамкі беларуска-швейцарскага ўзаемадзеяння, далейшыя крокі па пашырэнні супрацоўніцтва.
Алег Краўчанка і Крысціна Марці Ланг сустрэліся з удзельнікамі беларуска-швейцарскага экспертнага семінара па абмене вопытам у галіне прадухілення катаванняў і жорсткага абыходжання, які праходзіў гэтымі днямі ў Берне і Жэневе ў адпаведнасці з дамоўленасцю аб развіцці дыялогу па правах чалавека, дасягнутай на кансультацыях паміж знешнепалітычнымі ведамствамі Беларусі і Швейцарыі ў снежні 2018 года.-0-
