8 лістапада, Астана /БЕЛТА - ТАСС/. Краіны Арганізацыі Дагавора аб калектыўнай бяспецы прытрымліваюцца агульнай пазіцыі аб неабходнасці захавання Дагавора аб ліквідацыі ракет сярэдняй і меншай далёкасці (ДРСМД), такі тэзіс замацаваны ў дэкларацыі, вынесенай на разгляд кіраўнікоў дзяржаў арганізацыі. Аб гэтым заявіў кіраўнік МЗС РФ Сяргей Лаўроў.
"Мы абмяркоўвалі гэта ўчора на сустрэчы міністраў замежных спраў. Абмяркоўвалі падрабязна. У нас агульная пазіцыя, якая заключаецца ў тым, што дагавор з'яўляецца адным з важнейшых інструментаў па падтрыманні міжнароднай бяспекі і стабільнасці і што яго важна захаваць", - сказаў Сяргей Лаўроў журналістам.
Ён нагадаў, што адпаведная заява была прынята летам гэтага года на савеце міністраў замежных спраў АДКБ у Алма-Аце. У ёй адзначалася, што парушэнні ДРСМД дапускаюць ЗША, у той час як Расія, Беларусь і Казахстан поўнасцю выконваюць пагадненне.
"Сёння выносім на разгляд кіраўнікоў дзяржаў праект дэкларацыі, якая ў цэлым ахоплівае ўсе сферы кампетэнцыі нашай арганізацыі і ў якой ёсць спецыяльны тэзіс аб неабходнасці захавання жыццяздольнасці гэтага дагавора", - дадаў міністр.
20 кастрычніка прэзідэнт ЗША Дональд Трамп заявіў, што яго краіна выйдзе з ДРСМД, паколькі Расія нібыта яго парушае.
ДРСМД быў падпісаны 8 снежня 1987 года і ўступіў у сілу 1 чэрвеня 1988 года. Пад дзеянне дагавора падпадаюць разгорнутыя і неразгорнутыя ракеты меншай (ад 500 да 1000 км) і сярэдняй далёкасці (ад 1000 да 5500 км) наземнага базіравання.-0-