4 сакавіка, Гомель /Кар. БЕЛТА/. Асаблівасць знешняй палітыкі, праводзімай Беларуссю, у прыхільнасці да каштоўнасцей міралюбнасці, талерантнасці і добрасуседства. Такім меркаваннем з карэспандэнтам БЕЛТА, каменціруючы тэмы, якія абмяркоўваліся ў час "Вялікай размовы з Прэзідэнтам", падзяліўся намеснік старшыні Пастаяннай камісіі па міжнародных справах Палаты прадстаўнікоў Іван Корж.
"Такая палітыка Беларусі вельмі каштоўная ў сучасным неспакойным, няпростым свеце, у якім нямала экстрэмальных падзей, і, як падкрэсліў Аляксандр Лукашэнка, праводзіцца выключна ў інтарэсах забеспячэння бяспекі і захавання міру на нашай планеце", - адзначыў парламентарый. Іван Корж падкрэсліў, што Беларусь усё часцей выступае платформай міралюбівых ініцыятыў.
"Прэзідэнт акцэнтаваў увагу на тым, што беларусы супраць любых праяў агрэсіі - і ваеннай, і інфармацыйнай. Аднак новыя пункты напружанасці з'яўляюцца ў тым ліку і па перыметры нашай граніцы. Вельмі дакладна кіраўнік дзяржавы абазначае месца нашай краіны ў забеспячэнні бяспекі не толькі на еўрапейскім кантыненце, але і ў сусветным маштабе. Для нармалізацыі сітуацый Беларусь часта мае канкрэтныя прапановы, выходзіць з рознымі ініцыятывамі", - сказаў субяседнік. Пазіцыя рэспублікі адносна тых ці іншых падзей усё часцей гучыць на міжнародных арэнах, і да яе прыслухоўваюцца, дадаў ён.
Іван Корж таксама лічыць, што ў гэтым напрамку пэўная роля адведзена парламенту. "Дэпутаты прадстаўляюць Беларусь, яе пазіцыю па пытаннях бяспекі, у тым ліку інфармацыйнай, у розных міжнародных арганізацыях - Парламенцкай асамблеі АБСЕ, Міжпарламенцкім саюзе, Міжпарламенцкай асамблеі дзяржаў - удзельніц СНД і г. д.", - растлумачыў ён. Асаблівая ўвага знешнепалітычнаму вектару ўдзяляецца і ў Пастаяннай камісіі па міжнародных справах. У якасці прыкладу Іван Корж назваў абмеркаванне тэм бяспекі з удзелам беларускіх дэпутатаў на важных міжнародных форумах - канферэнцыі па пытаннях барацьбы з тэрарызмам у Берліне, парламенцкім форуме па пытаннях бяспекі і разведкі ў Вашынгтоне, удзельнікамі якога сталі прадстаўнікі больш як 80 краін.-0-
