30 верасня, Мінск /Аліна Грышкевіч - БЕЛТА/. Кітай мае намер сумесна з Беларуссю актыўна рэалізоўваць дамоўленасці на вышэйшым узроўні. Важнасць гэтага адзначыў Надзвычайны і Паўнамоцны Пасол Кітая ў Беларусі Цуй Цымін 27 верасня на ўрачыстым мерапрыемстве з нагоды 70-годдзя з дня ўтварэння КНР, паведамляе карэспандэнт БЕЛТА.
"Беларусь - гэта добры сябар і партнёр Кітая. Развіццё Кітая не можа абысціся без падтрымкі і дапамогі Беларусі, - падкрэсліў пасол. - З моманту ўстанаўлення дыпламатычных адносін паміж нашымі краінамі палітычны ўзаемадавер прадаўжае паглыбляцца, эканамічнае супрацоўніцтва пашыраецца, гуманітарныя абмены становяцца ўсё больш ажыўленымі, традыцыйная дружба бесперапынна ўмацоўваецца, у буйных міжнародных справах ажыццяўляецца цеснае супрацоўніцтва".
Паводле слоў Цуй Цыміна, кітайска-беларускія адносіны давернага ўсебаковага стратэгічнага партнёрства і ўзаемавыгаднага супрацоўніцтва прынеслі значную выгаду двум народам. "Кітай паслядоўна падтрымліваў незалежнасць, суверэнітэт і тэрытарыяльную цэласнасць Беларусі, паважаў выбраны ёю шлях развіцця, унутраную і знешнюю палітыку. Кітай і Беларусь заўсёды падтрымлівалі адзін аднаго ў пытаннях ключавых зацікаўленасцей і заклапочанасцей", - сказаў ён.
"Апошнія гады пад стратэгічным кіраўніцтвам Старшыні Сі Цзіньпіна і Прэзідэнта Аляксандра Лукашэнкі кітайска-беларускія адносіны падтрымліваюць добрую дынаміку здаровага і стабільнага развіцця. Супрацоўніцтва паміж дзяржавамі ў розных галінах выйшла на шлях паскоранага развіцця. Абодва бакі прыхільныя да развіцця дружбы", - прадоўжыў пасол.
На яго думку, адносіны паміж дзвюма краінамі знаходзяцца ў лепшым перыядзе развіцця ў гісторыі.
Цуй Цымін нагадаў, што ў бягучым годзе кіраўнікі дзвюх дзяржаў сустракаліся двойчы (у красавіку і чэрвені) і дасягнулі важных дамоўленасцей адносна паглыблення двухбаковых адносін, пашырэння супрацоўніцтва ў розных сферах і будавання "Пояса і шляху". Важным складнікам двухбаковага ўзаемадзеяння стала будаўніцтва Кітайска-беларускага індустрыяльнага парка "Вялікі камень". У ліпені там прайшоў Форум па рэгіянальным супрацоўніцтве і развіцці ў рамках ініцыятывы "Пояс і шлях", які пацвердзіў зацікаўленасць бакоў у далейшых кантактах.
Дыпламат звярнуў увагу, што цяпер свет зведвае вялікія перамены, нябачаныя за апошнія 100 гадоў: паглыбляюцца шматпалярнасць, эканамічная глабалізацыя, сацыяльная інфарматызацыя, культурная разнастайнасць. Пры гэтым паскараецца пашырэнне рэформы сістэмы глабальнага кіравання і міжнароднага парадку дня, у краінах з рынкам, што фарміруецца, і краінах, якія сталі на шлях развіцця, назіраецца хуткі ўздым. "Міжнародны баланс сіл імкнецца да раўнавагі, лёсы народаў свету ніколі не былі так цесна звязаны, як сёння. У той жа час свет сутыкаецца з нестабільнасцю і нявызначанасцю, сусветная эканоміка слабая, а гандлёвы пратэкцыянізм і папулізм прадаўжаюць расці. Кітайскі бок лічыць, што толькі прытрымліваючыся палітыкі адкрытасці, выступаючы супраць пратэкцыянізму, садзейнічаючы спрашчэнню гандлю і інвесціравання, можна дабівацца станоўчых вынікаў у эканамічнай глабалізацыі.
Цуй Цымін назваў важным той факт, што Беларусь і Кітай ва ўмовах складанай міжнароднай сітуацыі прадаўжаюць падтрымліваць адзін аднаго і развіваюць узаемавыгаднае супрацоўніцтва па ўсіх напрамках.
У сваім выступленні пасол КНР расказаў аб маштабных дасягненнях краіны за 70-гадовы шлях развіцця.-0-
