3 красавіка, Мінск /Аліна Грышкевіч - БЕЛТА/. Кітай мае намер прадаўжаць рэалізоўваць дамоўленасці, дасягнутыя Прэзідэнтам Беларусі Аляксандрам Лукашэнкам і Старшынёй КНР Сі Цзіньпінам. Аб гэтым заявіла намеснік старшыні Пастаяннага камітэта Усекітайскага сходу народных прадстаўнікоў Шэнь Юэюэ сёння на мерапрыемстве ў Беларускім таварыстве дружбы і культурнай сувязі з замежнымі краінамі, перадае карэспандэнт БЕЛТА.
"Мы гатовы з беларускімі калегамі разам рэалізоўваць дамоўленасці нашых лідараў, паглыбляць кітайска-беларускае стратэгічнае партнёрства, у тым ліку ў рамках рэалізацыі ініцыятывы і канцэпцыі "Адзін пояс і адзін шлях", - падкрэсліла яна. Высокая госця нагадала, што ў красавіку ў Пекіне адбудзецца Другі форум міжнароднага супрацоўніцтва "Адзін пояс і адзін шлях", удзел у якім павінен прыняць і Прэзідэнт Беларусі.
Намеснік старшыні Пастаяннага камітэта УСНП заявіла аб тым, што Кітай мае намер сумесна з Беларуссю пашыраць шматпланавае практычнае супрацоўніцтва, сумесна выкарыстоўваць шанцы развіцця на карысць двух народаў. "Кітайскі народ упарта змагаецца за ажыццяўленне мары аб вялікім адраджэнні кітайскай нацыі. Беларускі народ таксама прыкладае намаганні для ажыццяўлення мары жыць самастойным і шчаслівым жыццём, у спакойных, камфортных умовах. Давайце разам старацца, каб абедзве мары ажыццявіліся", - сказала Шэнь Юэюэ.-0-
