26 красавіка, Мінск /Кар. БЕЛТА/. Пытанне аб паглыбленні эканамічнага супрацоўніцтва паміж краінамі СНД па процідзеянні санкцыйнай палітыцы трэціх краін і іх аб'яднанняў разгледзяць 20 мая на пасяджэнні Савета кіраўнікоў урадаў СНД, паведаміў сёння журналістам першы намеснік старшыні Выканаўчага камітэта - выканаўчага сакратара СНД Леанід Анфімаў, перадае карэспандэнт БЕЛТА.
"Асноўным пытаннем, вядома, будзе ўнесенае нядаўна расійскім бокам пытанне аб паглыбленні эканамічнага супрацоўніцтва паміж краінамі СНД па процідзеянні санкцыйнай палітыцы трэціх краін і іх аб'яднанняў. Цяпер створана рабочая група пры Эканамічным савеце Садружнасці, якая займаецца пастаянным маніторынгам сітуацыі, звязанай з гэтымі санкцыйнымі недружалюбнымі дзеяннямі з боку трэціх дзяржаў", - сказаў Леанід Анфімаў.
Паводле яго слоў, у сувязі з гэтым актуальным з'яўляецца пераход ва ўзаемным гандлі краін СНД у нацыянальныя валюты, каб процістаяць санкцыйнаму націску. Першыя крокі ўжо ў гэтым напрамку зроблены: пачынаючы з 2013 года доля разлікаў у нацвалютах у гандлёвых адносінах краін ЕАЭС вырасла з 63 працэнтаў да 74 працэнтаў.
"Гэту практыку актывізацыі разлікаў у нацыянальных валютах трэба пераносіць на гандлёвыя адносіны паміж краінамі СНД. Пакуль паміж краінамі СНД доля нацвалют у разліках складае толькі 64 працэнты. Думаю, што пасля таго, як маніторынгавая група выдасць вынікі сваёй дзейнасці, гэта пытанне, хутчэй за ўсё, будзе разглядацца на сустрэчы кіраўнікоў урадаў. Пытанне эканамічнага супрацоўніцтва заўсёды разглядаецца на пасяджэнні Савета кіраўнікоў урадаў", - сказаў Леанід Анфімаў.
Акрамя таго, на маючым адбыцца пасяджэнні Савета кіраўнікоў урадаў будзе разгледжана пытанне аб выкананні першачарговых дзеянняў плана Стратэгіі інфармацыйнай бяспекі да 2030 года, разгледжана канцэпцыя развіцця вінаградарства і вінаробства ў краінах СНД, а таксама абмеркаваны арганізацыйныя і кадравыя пытанні.
Як чакаецца, пасяджэнне Савета кіраўнікоў урадаў СНД пройдзе ў рэжыме відэаканферэнцыі.
Пасяджэнне Савета пастаянных паўнамоцных прадстаўнікоў дзяржаў - удзельніц Садружнасці пры статутных і іншых органах Садружнасці праходзіць сёння ў Выканаўчым камітэце СНД у Мінску. Члены Савета пастаянных прадстаўнікоў маюць намер абмеркаваць чатыры пытанні. Сярод іх - ход падрыхтоўкі да чарговых пасяджэнняў Савета міністраў замежных спраў і Савета кіраўнікоў урадаў СНД.
Пастаянныя паўнамоцныя прадстаўнікі таксама абмяркуюць вынікі рэалізацыі мерапрыемстваў, прысвечаных Году архітэктуры і горадабудаўніцтва ў Садружнасці Незалежных Дзяржаў. У 2021 годзе ў рамках тэматычнага года ў дзяржавах - удзельніцах СНД праведзены шэраг маштабных мерапрыемстваў для экспертаў у сферы архітэктуры і горадабудаўніцтва. У іх ліку тэматычныя канферэнцыі, фестывалі, конкурсы, майстар-класы, выстаўкі, лекцыі і семінары, якія сталі пляцоўкамі для выпрацоўкі ўзгодненай палітыкі па далейшым плённым супрацоўніцтве дзяржаў Садружнасці ў сферы архітэктуры і горадабудаўніцтва, месцам для абмену вопытам па выкарыстанні лепшых практык і напрацовак.-0-
