18 чэрвеня, Мінск /Кар. БЕЛТА/. Па ініцыятыве фінляндскага боку адбылася тэлефонная размова міністра замежных спраў Беларусі Уладзіміра Макея з міністрам замежных спраў Фінляндыі Пека Хаавіста. Такая інфармацыя размешчана на сайце беларускага МЗС, паведамляе БЕЛТА.
"Кіраўнікі знешнепалітычных ведамстваў абмеркавалі праблематыку процідзеяння каранавіруснай інфекцыі ў Беларусі і Фінляндыі і меры па ўмацаванні міжнароднага супрацоўніцтва ў пераадоленні наступстваў пандэміі пры каардынуючай ролі Сусветнай арганізацыі аховы здароўя", - расказалі ў міністэрстве.
Па просьбе фінляндскага боку міністр замежных спраў Беларусі пракаменціраваў актуальную сітуацыю напярэдадні старту прэзідэнцкай кампаніі ў рэспубліцы.
Паводле інфармацыі ведамства, міністры адзначылі канструктыўнае ўзаемадзеянне ў вяртанні на радзіму беларускіх і фінляндскіх грамадзян, падкрэслілі важнасць захавання прамых авіярэйсаў паміж дзюма краінамі. Дыпламаты таксама абмеркавалі пытанні двухбаковага супрацоўніцтва, узаемадзеяння Беларусі і ЕС, уключаючы ініцыятыву "Усходняе партнёрства".-0-
