6 снежня, Масква /Эдуард Півавар - БЕЛТА/. Прэзідэнт Беларусі Аляксандр Лукашэнка сваёй ініцыятывай аб магчымым размяшчэнні ў Беларусі расійскай ядзернай зброі адказаў на пагрозы Захаду размясціць свой ядзерны патэнцыял у Польшчы і краінах Балтыі. На гэта ўказаў у час сённяшняга круглага стала ў Маскве расійскі журналіст і ваенны эксперт, галоўны рэдактар часопіса "Национальная оборона" Ігар Каротчанка, перадае карэспандэнт БЕЛТА.
"Прэзідэнт Беларусі Аляксандр Лукашэнка абазначыў шэраг новых ініцыятыў у галіне ваеннага супрацоўніцтва з Расіяй, у тым ліку не выключыў магчымасці пры пэўных абставінах размяшчэння расійскай ядзернай зброі на тэрыторыі Рэспублікі Беларусь, - сказаў Ігар Каротчанка. - Аб чым ідзе размова? Размова не ідзе аб аднаўленні фармату ранейшай прысутнасці часцей РВСП, якія мелі месца на момант распаду Савецкага Саюза. Відавочна, усё ж такі размова ідзе аб размяшчэнні тактычнай ядзернай зброі і яе носьбітаў. Гэта вельмі адчувальны аспект. І нагадаю, што Прэзідэнт Беларусі выказаў такую магчымасць у адказ на ўжо агучаныя шэрагам высокапастаўленых заходніх функцыянераў і палітыкаў заявы аб магчымасці перакідкі амерыканскай тактычнай ядзернай зброі з баз захоўвання ў Германіі і шэрагу іншых краін непасрэдна на тэрыторыю Польшчы і, магчыма, на тэрыторыю краін Балтыі. Таму ў адказ на такія пагрозы і была выказана магчымасць парыравання адпаведным размяшчэннем расійскай тактычнай ядзернай зброі".
"Хоць Аляксандр Лукашэнка ў інтэрв'ю Дзмітрыю Кісялёву не стаў канкрэтызаваць тыпы носьбітаў, магчымыя боезарады, іх ядзерны і тратылавы эквівалент, я ўсё ж такі лічу з ваеннага пункту, што калі раптам на тэрыторыі Польшчы з'явіцца амерыканская тактычная ядзерная зброя, то відавочна па ўзгадненні Масквы і Мінска размова можа ісці менавіта аб размяшчэнні расійскай тактычнай ядзернай зброі і яе носьбітаў, якімі могуць выступаць і сучасныя аператыўна-тактычныя ракетныя комплексы, у прыватнасці "Іскандэр-М", на тэрыторыі Беларусі", - указаў эксперт.
"Але гэта, вядома, крайні сцэнарый, непажаданы. Мы катэгарычна не вітаем яго, але ў рамках суверэнітэту Саюзнай дзяржавы, калі на тэрыторыі Польшчы з'яўляецца амерыканская тактычная ядзерная зброя, то адказ ужо агучаны. І якім ён будзе - відавочна", - падкрэсліў Ігар Каротчанка.-0-
