27 жніўня, Мінск /Кар. БЕЛТА/. У Садружнасці Незалежных Дзяржаў працуюць над актуалізацыяй канцэпцыі паэтапнага фарміравання агульнага рынку працы і рэгулявання міграцыі рабочай сілы. Пасяджэнне адпаведнай рабочай групы прайшло 26 жніўня па відэа-канферэнц-сувязі. Аб гэтым БЕЛТА паведамілі ў прэс-службе Выканаўчага камітэта СНД.
Удзельнічалі ў пасяджэнні прадстаўнікі Арменіі, Беларусі, Казахстана, Расіі, Таджыкістана, Узбекістана і Выканаўчага камітэта СНД. Члены рабочай групы абмеркавалі папраўкі, што паступілі ад дзяржаў, канцэптуальныя падыходы і прапановы па актуалізацыі канцэпцыі. Таксама былі разгледжаны заўвагі і прапановы, якія датычацца распрацоўкі плана мерапрыемстваў па рэалізацыі названай канцэпцыі.
"Адзначым, што гэта работа праводзіцца ў адпаведнасці з планам мерапрыемстваў па рэалізацыі першага этапу (2021-2025 гады) Стратэгіі эканамічнага развіцця Садружнасці на перыяд да 2030 года. У дакуменце прапісаны задачы па вызначэнні ўзгодненых падыходаў да стварэння прававых і інстытуцыянальных умоў для рацыянальнага выкарыстання працоўнага патэнцыялу дзяржаў СНД, а таксама свабоднага перамяшчэння рабочай сілы, адаптацыі мігрантаў да патрабаванняў і звычаяў дзяржавы працаўладкавання", - адзначылі ў прэс-службе.
Работа па актуалізацыі канцэпцыі і падрыхтоўка плана яе рэалізацыі будуць разгледжаны ў тым ліку і на чарговым пасяджэнні Кансультатыўнага савета па працы, занятасці і сацыяльнай абароне насельніцтва дзяржаў СНД у кастрычніку.-0-