12 лістапада, Мінск /Кар. БЕЛТА/. Кансультацыі паміж міністэрствамі замежных спраў на тэму "Аб узаемадзеянні дзяржаў - удзельніц СНД у інфармацыйнай сферы" пройдуць 15-16 лістапада ў Бішкеку. Аб гэтым БЕЛТА паведамілі ў прэс-службе Выканкама СНД.
Плануецца, што ў час сустрэчы ўдзельнікі кансультацый абмяняюцца вопытам інфармацыйнага суправаджэння знешняй палітыкі і работы са СМІ, абмяркуюць інфармацыйнае забеспячэнне значных падзей на прасторы Садружнасці.
Прадстаўнікі знешнепалітычных ведамстваў таксама разгледзяць пытанні садзейнічання паглыбленню супрацоўніцтва паміж нацыянальнымі СМІ краін СНД і каардынацыі падыходаў краін у профільных міжнародных структурах (ААН, ЮНЕСКА, АБСЕ і інш.) і на пляцоўках вялікіх медыяфорумаў. Акрамя таго, плануецца вызначыць дату і месца правядзення наступных кансультацый паміж міністэрствамі замежных спраў па пытаннях узаемадзеяння дзяржаў Садружнасці ў інфармацыйнай сферы.-0-
