2 красавіка, Мінск /Кар. БЕЛТА/. Сітуацыя ў свеце патрабуе ад Беларусі мабілізацыі намаганняў і гатоўнасці аператыўна рэагаваць на выклікі. Аб гэтым заявіла старшыня Савета Рэспублікі Наталля Качанава на адкрыцці вясенняй сесіі верхняй палаты беларускага парламента, перадае карэспандэнт БЕЛТА.
Сітуацыя ў свеце сёння няпростая, у тым ліку з-за эпідэміялагічнай абстаноўкі, канстатавала Наталля Качанава. Зніжаецца вытворчая актыўнасць, з сур'ёзнымі праблемамі сутыкаюцца сыравінныя і таварныя рынкі, сектар паслуг, парушаны кааперацыйныя сувязі паміж дзяржавамі. "Негатыўны ўплыў адчуваюць на сабе ўсе краіны свету, у тым ліку і Беларусь. Гэта патрабуе ад нас мабілізацыі намаганняў, гатоўнасці аператыўна рэагаваць на выклікі, якія ўзнікаюць", - лічыць старшыня Савета Рэспублікі.
"Мы вельмі добра разумеем, што галоўнае - гэта эканоміка, а адпаведна, і дабрабыт нашых грамадзян. Прадпрыемствы павінны працаваць, людзі - атрымліваць заработную плату, а бюджэт - сродкі для выканання сацыяльных праграм і абавязацельстваў", - падкрэсліла спікер.
У гэтым годзе завяршаецца пяцігодка. Наталля Качанава нагадала, што 17 сакавіка на нарадзе ў Прэзідэнта былі падведзены вынікі сацыяльна-эканамічнага развіцця краіны за 2019 год, разгледжаны прыярытэты і асноўныя напрамкі на сярэднетэрміновы перыяд. Мэтавая задача - устойлівы эканамічны рост з тэмпамі 3-4 працэнты на год. "Для гэтага неабходна забяспечыць эфектыўную работу кожнага прадпрыемства, раўнамернае і ўстойлівае развіццё ўсіх рэгіёнаў краіны, стварыць умовы для прыцягнення замежных і ўнутраных інвестыцый, нарошчваць экспарт, у тым ліку на новыя рынкі збыту", - сказала старшыня Савета Рэспублікі.
Безумоўным прыярытэтам яна назвала павышэнне якасці выпускаемай прадукцыі і аказваемых паслуг. "Гэта важнейшы фактар канкурэнтаздольнасці нашых прадпрыемстваў і краіны ў цэлым. Савет Рэспублікі ўнёс адпаведныя прапановы ва ўрад", - праінфармавала Наталля Качанава.-0-
