21 мая, Мінск /Кар. БЕЛТА/. Да правядзення канстытуцыйнага рэферэндуму выбарчае заканадаўства мяняцца не будзе, паведаміла журналістам старшыня ЦВК Лідзія Ярмошына. Яна прымае ўдзел у міжнароднай канферэнцыі "Процідзеянне знешнім выклікам і пагрозам: парламенцкае вымярэнне Саюзнай дзяржавы", перадае карэспандэнт БЕЛТА.
"Давайце не будзем ідэалізаваць любы закон. Усё ж такі ён разлічаны на законапаслухмянае выкананне. Вядома, выбарчае заканадаўства Рэспублікі Беларусь падлягае мадэрнізацыі, яно ўстарэла. Выбарчы кодэкс прымаўся ў 2000 годзе, а мы ўжо жывём у 2021-м. Гэта сведчыць аб тым, наколькі ён быў распрацаваны ўдала, наколькі ён з'яўляецца якасным, калі пасля змянення Канстытуцыі будзе мяняцца выбарчае заканадаўства. Таму, вядома, да правядзення канстытуцыйнага рэферэндуму выбарчае заканадаўства мяняцца не будзе".
Паводле яе слоў, рэферэндум будзе праводзіцца па дзеючых правілах. "Але ўжо ўсе наступныя выбары, я ўпэўнена, будуць праводзіцца па больш дасканалых нормах, якія будуць улічваць усе тыя грамадскія выклікі, якія мелі месца пры правядзенні апошняй выбарчай кампаніі па выбарах Прэзідэнта Рэспублікі Беларусь", - адзначыла старшыня ЦВК.
Міжнародная канферэнцыя "Процідзеянне знешнім выклікам і пагрозам: парламенцкае вымярэнне Саюзнай дзяржавы" праходзіць у камбінаваным фармаце (анлайн і афлайн) з падключэннем студый у Маскве і Мінску, а таксама ў іншых гарадах СНД. Да ўдзелу запрошаны дэпутаты Парламенцкага сходу, члены Палат парламентаў Беларусі і Расіі, прадстаўнікі міжнародных арганізацый, міністэрстваў і ведамстваў, вышэйшых навучальных устаноў і навукова-даследчых інстытутаў Беларусі і Расіі, а таксама вядучыя эксперты ў галіне права і паліталогіі.
Канферэнцыя ўключае пленарнае пасяджэнне і работу трох секцый: "Процідзеянне знешнім выклікам і пагрозам. Захаванне правоў і свабод грамадзян у Саюзнай дзяржаве і замежных краінах", "Выбарчае заканадаўства і практыка яго прымянення ў Рэспубліцы Беларусь, Расійскай Федэрацыі і замежных краінах" і "Захаванне гістарычнай памяці, процідзеянне спробам гераізацыі нацызму і перагляду вынікаў Вялікай Айчыннай вайны".
Мерапрыемства праводзіцца ў адпаведнасці з даручэннем кіраўніцтва Парламенцкага сходу, дадзеным у ходзе правядзення 59-й сесіі Парламенцкага сходу Саюза Беларусі і Расіі.-0-
