7 верасня, Мінск /Аліна Грышкевіч - БЕЛТА/. Іран зацікаўлены ў развіцці ўсебаковага супрацоўніцтва з Беларуссю. Аб гэтым заявіў карэспандэнту БЕЛТА Надзвычайны і Паўнамоцны Пасол Ірана ў Беларусі Мастафа Авейсі.
Напярэдадні ў Беларусь прыбыла парламенцкая дэлегацыя Ірана з афіцыйным візітам. Узначальвае дэлегацыю старшыня Сходу ісламскага савета Алі Ларыджані.
Дыпламат падкрэсліў важнасць візіту Алі Ларыджані. У час сустрэч і перагавораў у Мінску высокі іранскі госць мае намер абмеркаваць шырокі спектр пытанняў, звязаных са станам і перспектывамі беларуска-іранскага ўзаемадзеяння. Акрамя таго, звярнуў увагу пасол, чатыры гады таму Алі Ларыджані прыязджаў у Беларусь, таму трэба будзе разгледзець выкананне дасягнутых тады дамоўленасцей.
Як падкрэсліў Мастафа Авейсі, для іранскага боку важна далейшае развіццё эканамічных, навуковых, адукацыйных і культурных сувязей. У прыватнасці, паміж Беларуссю і Іранам у гэтым годзе падпісаны дакумент аб пастаўцы на іранскі рынак беларускага мяса на суму амаль $100 млн. Ёсць намеры аб пашырэнні кантактаў у іншых сферах эканомікі.-0-
