18 сакавіка, Мінск /Аліна Грышкевіч - БЕЛТА/. Іран лічыць перспектыўным далейшае развіццё супрацоўніцтва з Беларуссю, асабліва ўлічваючы членства краіны ў ЕАЭС. Аб гэтым заявіў карэспандэнту БЕЛТА Надзвычайны і Паўнамоцны Пасол Ісламскай Рэспублікі Іран у Беларусі Саід Яры ў сувязі з 27-годдзем усталявання беларуска-іранскіх дыпламатычных адносін, што адзначаецца 18 сакавіка.
"Пашырэнне ўзаемадзеяння ў рамках Еўразійскага эканамічнага саюза - важны аспект у новай дарожнай карце супрацоўніцтва паміж нашымі краінамі, - адзначыў кіраўнік іранскай дыпламатычнай місіі. - Ратыфікацыя прэферэнцыйнага гандлёвага пагаднення паміж Іранам і ЕАЭС у мінулым годзе, а таксама старшынства Беларусі ў органах саюза ў 2020 годзе ствараюць добрыя перспектывы для пашырэння беларуска-іранскіх эканамічных сувязей".
"Іран і Беларусь маюць узаемадапаўняльныя магчымасці ў эканоміцы, якія пакуль не выкарыстаны ў дастатковай меры. У сувязі з гэтым плануецца распрацаваць новыя падыходы ў супрацоўніцтве, мы чакаем, што яны будуць сфармуляваны на наступным пасяджэнні сумеснай эканамічнай камісіі, якое спадзяёмся правесці ў гэтым годзе", - сказаў дыпламат.
Паводле слоў Саіда Яры, іранскі бок лічыць неабходным больш актыўна выкарыстоўваць дасягненні Беларусі ў такіх прамысловых напрамках, як вытворчасць трактароў, камбайнаў, аўтобусаў і грузавікоў, дрэваапрацоўка. Іран у сваю чаргу гатовы прапанаваць свае магчымасці ў нафтахіміі, фармацэўтыцы, сферы будаўнічых матэрыялаў, а таксама сельскагаспадарчых прадуктаў.
"Іранскія кампаніі ўзводзяць у Беларусі офісныя і гандлёвыя будынкі, сельскагаспадарчыя і жывёлагадоўчыя комплексы, вытворчасць парашковых фарбаў. Недалёка ад Мінска з удзелам іранскага боку створаны лагістычны цэнтр "Прылессе", - прадоўжыў пасол. - Ёсць сумесныя праекты ў галіне медыцыны і фармацэўтыкі, паміж рознымі навуковымі цэнтрамі. Сумесная беларуска-іранская камісія па навуцы і тэхналогіях - адзін з важнейшых механізмаў каардынацыі гэтых праектаў. Мы спадзяёмся правесці ў гэтым годзе ў Тэгеране сёмае пасяджэнне камісіі". Разам з тым дыпламат звярнуў увагу, што рэалізацыі большай колькасці інвестыцыйных праектаў перашкаджаюць уведзеныя супраць Ірана амерыканскія санкцыі.
На пытанне аб магчымасці паставак іранскай нафты ў Беларусь пасол адказаў: "Цяпер урадам Беларусі не было накіравана афіцыйнай просьбы аб закупцы нафты ў Ірана, і абодва бакі не вялі такіх перагавораў. Вядома, як адзін з буйнейшых экспарцёраў нафты на Блізкім Усходзе мы імкнёмся прадаваць нафту і нафтапрадукты. Гэта справа мае чыста камерцыйны характар, і яе не варта палітызаваць".
"Беларусь і Іран адзначаюць 27 гадоў усталявання дыпламатычных адносін. За гэты перыяд двухбаковыя сувязі развіваліся на аснове ўзаемаразумення і павагі. Адбыліся сустрэчы на вышэйшым узроўні, абмен дэлегацыямі на ўзроўні міністраў, прайшло 14 пасяджэнняў сумеснай эканамічнай камісіі, шэсць пасяджэнняў сумеснай камісіі па навуцы і тэхналогіях , пяць палітычных кансультацый, пяць пасяджэнняў сумесных консульскіх камісій, падпісаны шэраг важных двухбаковых дакументаў", - рэзюмаваў пасол.
Саід Яры таксама закрануў тэму каранавіруса: "На жаль, каранавірус цяпер захоплівае ўвесь свет. Іран не стаў выключэннем, і нягледзячы на ўсе прынятыя санітарныя і медыцынскія меры, вірус за апошнія тыдні распаўсюдзіўся хуткімі тэмпамі". Дыпламат лічыць, што варта аб'яднаць намаганні ўсіх краін свету для супрацьстаяння пандэміі.-0-
