14 мая, Мінск /Кар. БЕЛТА/. Імёны кандыдатаў у Прэзідэнты Беларусі стануць вядомы ў ліпені, заявіла сёння старшыня ЦВК Лідзія Ярмошына ў праграме "Актуальны мікрафон" у эфіры Першага нацыянальнага канала Беларускага радыё, паведамляе карэспандэнт БЕЛТА.
Члены ініцыятыўных груп па вылучэнні кандыдатаў у Прэзідэнты будуць збіраць подпісы з 21 мая па 19 чэрвеня ўключна. Падпісныя лісты правяраюцца 20 дзён. "У перыяд з 5 па 14 ліпеня Цэнтральная камісія правядзе пасяджэнне, і тады народ будзе ведаць спісы кандыдатаў у Прэзідэнты. Яны ўсе атрымаюць бясплатны эфірны час на тэлебачанні і радыё, газетныя плошчы. Акрамя таго, ЦВК вырабіць інфармацыйныя буклеты з кароткімі біяграфічнымі данымі кожнага з кандыдатаў", - расказала Лідзія Ярмошына.
Адказваючы на пытанне аб запрашэнні на выбары міжнародных наглядальнікаў, старшыня ЦВК праінфармавала, што яно пакуль не вырашана. "Пытанне з замежнымі наглядальнікамі пакуль не вырашана з улікам складанай абстаноўкі. Мы вернемся да яго крыху пазней, можа, у чэрвені", - адзначыла кіраўнік Цэнтрвыбаркама.
Як паведамлялася, Палата прадстаўнікоў назначыла прэзідэнцкія выбары на 9 жніўня. Датэрміновае галасаванне адбудзецца з 4 па 8 жніўня. Вынікі выбараў Цэнтрвыбаркам павінен падвесці не пазней за 19 жніўня. Другі тур, калі ў ім будзе неабходнасць, згодна з планам павінен прайсці не пазней чым у двухтыднёвы тэрмін, гэта значыць 23 жніўня.-0-
