16 лістапада, Мінск /Кар. БЕЛТА/. Дзеянням польскіх ваенных на граніцы няма лагічнага тлумачэння. Аб гэтым заявіў сёння журналістам міністр абароны Віктар Хрэнін пасля нарады ў кіраўніка дзяржавы аб абстаноўцы на Дзяржаўнай граніцы, перадае карэспандэнт БЕЛТА.
На прыгранічнай тэрыторыі Польшча размясціла групоўку з 23 тыс. ваеннаслужачых. Для іх на граніцы абсталявана 13 лагераў. Як раней заяўляў польскі бок, задача ваеннаслужачых - барацьба з нелегальнай міграцыяй. Аднак да канца так і незразумела, навошта да гэтага прыцягнута вялікая колькасць ваеннага кантынгенту і бранятэхніка.
"На жаль, мы не бачым логікі. На іх неадэкватныя дзеянні мы плануем свае адэкватныя дзеянні, каб не ствараць напружанасці ў рэгіёне і канфліктнай сітуацыі. Цяжка вылічыць, якія рашэнні яны прымаюць. Хоць мы мяркуем, што, напэўна, нашы суседзі спрабуюць займець палітычныя і эканамічныя бонусы, а можа, нават і ўвесь Еўрасаюз уцягнуць у гэту праблему, якая стварылася на нашай дзяржграніцы", - адзначыў Віктар Хрэнін.
У адпаведнасці з Венскім дакументам аб мерах умацавання даверу і бяспекі, калі краіна размяшчае на граніцы больш за 6 тыс. ваеннаслужачых, то яна павінна пачаць абменьвацца данымі і праводзіць кансультацыі з сумежнай дзяржавай. Аднак на запыты беларускага боку польскае ваеннае ведамства не рэагуе.
"На кантакт з намі не ідуць. Мы накіроўвалі запыт правесці кансультацыі. Да гэтага часу няма адказу. Наш аташэ выклікаўся ў польскае ваеннае ведамства на мінулым тыдні, дзе былі прад'яўлены неабгрунтаваныя абвінавачанні ў наш адрас. Было сказана, што нашы ваеннаслужачыя парушылі іх дзяржграніцу і ўвайшлі ўглыб. Мы папрасілі, каб яны прад'явілі факты - да гэтага часу гэтага няма. Мы са свайго боку запрасілі іх ваеннага аташэ, давялі нашу пазіцыю і папрасілі прадаставіць абвінаваўчыя факты і ўсё ж такі пайсці на кансультацыі і дыялог. Дыялогу няма. У выніку іх ваенны аташэ проста сабраўся і паехаў: у водпуск або куды, не ведаю", - расказаў аб спробах кантакту з польскім бокам міністр.-0-