13 лютага, Мінск /Кар. БЕЛТА/. Украіна магла б пазбегнуць катастрафічных працэсаў, калі выконвала б Мінскія пагадненні. Такім меркаваннем на тэлеканале СТБ падзяліўся прэс-сакратар Міністэрства замежных спраў Анатоль Глаз, паведамляе БЕЛТА.
Абмяркоўваючы Мінскія пагадненні, Анатоль Глаз адзначыў, што калі б у момант іх падпісання народу і палітычнаму кіраўніцтву Украіны сказалі, што будзе ў выніку іх невыканання, рашэнне было б больш адназначным. На думку прэс-сакратара МЗС, не трэба верыць спекуляцыям накшталт заявы Пятра Парашэнкі аб тым, што Мінскія пагадненні былі патрэбны, каб узмацніць армію Украіны.
"Мінскія пагадненні сваю ролю адыгралі. Вельмі сур'ёзна спынілі эскалацыю канфлікту, дапамаглі людзям на месцах і маглі быць выкананы да канца, для гэтага былі ўсе перадумовы, яны былі цалкам нармальна напісаны. І сёння Украіна магла б сама мяняцца знутры без тых катастрафічных і трагічных працэсаў, якія там цяпер адбываюцца. Гэта што датычыцца Мінскіх пагадненняў", - сказаў Анатоль Глаз.
Што датычыцца дзейнасці фондаў Сораса і глабальнай палітыкі, то для Беларусі цалкам відавочна, што ў спакоі краіну яшчэ доўга не пакінуць. Анатоль Глаз заявіў, што суверэнітэт каштуе дорага. "Ёсць пэўны гістарычны перыяд, калі трэба выстаяць і пасля гэтага ўзяць новы старт. Думаю, у нас гэта атрымаецца. Зразумела, ва Украіне таксама настане мір", - рэзюмаваў прэс-сакратар МЗС.-0-
