16 мая, Мінск /Кар. БЕЛТА/. Санкцыі сталі інструментам гібрыднай агрэсіі. Аб гэтым заявіў прэм'ер-міністр Беларусі Раман Галоўчанка ў інтэрв'ю тэлеканалу Al Arabiya, паведамляе карэспандэнт БЕЛТА.
"Мы адназначна трактуем санкцыі як інструмент не проста націску, а гібрыднай агрэсіі. Напэўна, гэта апошняя стадыя, якая папярэднічае класічнай узброенай агрэсіі. Мэта цяперашніх санкцый, у адрозненне ад класічнага разумення, - паставіць краіну на калені, задушыць яе эканамічна і дабіцца сілавым шляхам выканання нейкіх патрабаванняў або ўмоў. Гэта тое, што мы цяпер назіраем", - падкрэсліў Раман Галоўчанка.
Паводле яго слоў, з-за санкцый апынуўся заблакіраваны практычна ўвесь экспарт Беларусі ў краіны Еўрапейскага саюза і Паўночнай Амерыкі. "Гэта сума ў год складае каля $16-18 млрд. Зразумела, мы не можам страціць гэты аб'ём экспарту і павінны яго пераарыентаваць на іншыя рынкі, у тым ліку азіяцкі, афрыканскі, Блізкага Усходу і Арабскага заліва. Гэта тое, над чым мы цяпер працуем", - адзначыў прэм'ер-міністр.-0-
