19 снежня, Мінск /Кар. БЕЛТА/. Сама сітуацыя падштурхоўвае Беларусь і Расію да таго, каб усе дыскусійныя пытанні сёння зняць, заявіў прэм'ер-міністр Раман Галоўчанка. Прэм'ер адказаў на пытанні журналістаў перад пачаткам перагавораў прэзідэнтаў Беларусі і Расіі Аляксандра Лукашэнкі і Уладзіміра Пуціна, паведамляе карэспандэнт БЕЛТА.
"Дэлегацыі рыхтаваліся да перагавораў - і беларуская, і расійская. Па пытанні цэнаўтварэння на газ, які пастаўляецца ў Беларусь, у прынцыпе, варыянты падрыхтаваны. Упэўнены, што кіраўніцтва нашых краін сёння нейкі з іх прыме. Мы пазітыўна настроены. І лічым, што сама сітуацыя цяпер падштурхоўвае да таго, каб нешматлікія не спрэчныя, не праблемныя, а дыскусійныя пытанні, якія засталіся, зняць", - сказаў Раман Галоўчанка.
Нашы краіны рухаюцца па шляху саюзнай інтэграцыі, прадоўжыў прэм'ер. "Рэалізуем тыя мерапрыемствы, якія закладзены ў праграмах. Вельмі важны для нас цяпер нават не энерганосьбіты. З імі ўсё ў парадку, пытанне крыху камерцыйнае, так скажам. Галоўнае для нас - гэта прамысловасць, аператыўныя меры па развіцці прамысловасці Саюзнай дзяржавы. Мы павінны абараніць наш агульны рынак, па-першае, ад неабгрунтаванага імпарту і рэалізаваць сумесныя інтэграцыйныя праекты ў прамысловасці. Таму што эканамічная бяспека Саюзнай дзяржавы - гэта той лейтматыў, які вызначае будучыню Саюза", - дапоўніў ён.-0-
