ДЗЯРЖОРГАНЫДЗЯРЖОРГАНЫ
Флаг Аўторак, 18 студзеня 2022
Мінск Пераменная воблачнасць -6°C
Усе навіны
Усе навіны
Палітыка
25 лістапада 2021, 16:44

Галоўчанка: наспела неабходнасць падрыхтоўкі дагавора аб супрацоўніцтве паміж ШАС і АДКБ

25 лістапада, Мінск /Кар. БЕЛТА/. Наспела неабходнасць падрыхтоўкі дагавора аб супрацоўніцтве і ўзаемаразуменні паміж Шанхайскай арганізацыяй супрацоўніцтва і АДКБ. Аб гэтым заявіў прэм'ер-міністр Беларусі Раман Галоўчанка ў час пасяджэння Савета кіраўнікоў урадаў дзяржаў - членаў ШАС, якое праходзіць у рэжыме відэаканферэнцыі, перадае карэспандэнт БЕЛТА.

Сярод прыярытэтных для Беларусі напрамкаў супрацоўніцтва з ШАС - забеспячэнне міру і стабільнасці ў рэгіёне, а таксама бяспекі грамадзян. "На жаль, прынцыпы і дамоўленасці ў галіне міжнароднай бяспекі, якія выбудоўваліся дзесяцігоддзямі, бесцырымонна парушаюцца шэрагам дзяржаў, каб дагадзіць уласным інтарэсам. Афганістан стаў яскравым прыкладам правальнай палітыкі сілавых метадаў навязвання краінам чужой мадэлі развіцця і небяспечных наступстваў у выглядзе ўсё большых рызык распаўсюджвання тэрарызму, усплёску наркатрафіка, гуманітарнага крызісу. Палітычны і эканамічны патэнцыял краін ШАС можа адыграць важную ролю ў дасягненні ўнутранага міру і згоды ў Афганістане, аднаўленні яго эканомікі", - сказаў Раман Галоўчанка.

Ён таксама падкрэсліў, што павышаецца роля ШАС у мінімізацыі пагроз і забеспячэнні бяспекі ў рэгіёне ў цэлым. "Беларусь, з'яўляючыся дзяржавай - наглядальнікам пры ШАС і паўнапраўным членам АДКБ, лічыць, што наспела неабходнасць падрыхтоўкі поўнафарматнага дагавора аб супрацоўніцтве і ўзаемаразуменні паміж ШАС і АДКБ. Такі дакумент даў бы магчымасць вывесці рэгіянальнае супрацоўніцтва на новы ўзровень для барацьбы з выклікамі і пагрозамі ў сферы бяспекі, а таксама істотна павысіць міжнародны ўплыў дзвюх нашых арганізацый", - лічыць прэм'ер-міністр.

Раман Галоўчанка павіншаваў удзельнікаў пасяджэння з 20-годдзем утварэння ШАС. "Гісторыя ШАС і цяперашні этап яе развіцця пераканаўча дэманструюць вялікі стваральны патэнцыял арганізацыі для далейшага ўмацавання атмасферы даверу і палітычнага дыялогу краін з рознымі гістарычнымі лёсамі, менталітэтам і культурнымі каштоўнасцямі для развіцця сумесных эканамічных і гуманітарных праектаў, новых сістэм кааперацыі, востра запатрабаваных у сучасных умовах і выгадных для ўсіх дзяржаў сям'і ШАС. Нацэленасць арганізацыі ў будучыню наглядна пацвердзіла юбілейнае пасяджэнне Савета кіраўнікоў дзяржаў ШАС, праведзенае ў верасні гэтага года пад старшынствам Таджыкістана. Беларусь вітае прынятыя на гэтым пасяджэнні дакументы і гатова актыўна падключацца да іх рэалізацыі", - заявіў ён.

Прэм'ер-міністр таксама канстатаваў нязменнасць прыярытэтаў Беларусі ў ШАС. Гэта канструктыўнае ўзаемадзеянне з партнёрамі па ўмацаванні рэгіянальнай бяспекі, развіцці эканамічнага ўзаемадзеяння, паглыбленні гуманітарных сувязей. Беларусь таксама зацікаўлена ў больш насычаным удзеле ў буйных праектах і праграмах у рамках арганізацыі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі