3 сакавіка, Мінск /Кар. БЕЛТА/. Нават Пентагон абвяргае фэйкі пра беларускіх ваенных ва Украіне, заявіў карэспандэнту БЕЛТА дэпутат Палаты прадстаўнікоў, старшыня Ліберальна-дэмакратычнай партыі Беларусі Алег Гайдукевіч.
"Нават Пентагон ужо заявіў, што няма там беларускіх ваенных. Усе, хто распаўсюджваюць гэтыя фэйкі, не ведаюць аднаго - уладкавання беларускай арміі. У нас моцная армія, але яна арыентавана на абарону. І ніхто ніколі не ставіў пытанне перад намі, каб нашы салдаты ўдзельнічалі ў ваеннай аперацыі за межамі краіны. Такой ніколі задачы не было і не будзе, я перакананы", - сказаў Алег Гайдукевіч.
Паводле яго слоў, наша самая важная задача - ахова граніцы. "Нават з пункту гледжання разважлівасці не разумеюць тыя, хто распаўсюджвае гэтыя фэйкі, што калі мы сваіх салдат некуды адпраўляем - мы агаляем граніцу. Мы агаляем адразу Беларусь. Мы гэтага рабіць не можам. У нас тры задачы. Першая - самая галоўная - ахова дзяржаўнай граніцы Беларусі і ахова спакою нашых грамадзян. Каб тут было спакойна. Другая - недапушчэнне нанясення ўдару па Расіі са спіны, з тэрыторыі Беларусі. І трэцяя задача як суверэннай дзяржавы - гэта перагаворны працэс, які дзякуючы нам і ідзе, - адзначыў парламентарый. - Вось тры задачы, якія ёсць у нашай краіны. Усё астатняе - гэта хлусня і якраз задача тых людзей, якія не аб міры думаюць, а максімальна хочуць ўсю Еўропу ўцягнуць ва ўзброены канфлікт. А мы робім усё, каб быў мір".
Алег Гайдукевіч падкрэсліў, што супраць Беларусі ідзе інфармацыйная вайна. "Трэба да гэтага спакойна ставіцца. Усё, што цяпер у інтэрнэце - гэта хлусня на 90 працэнтаў. І трэба прымаць больш рашучыя меры аж да адключэння ўсіх гэтых рэсурсаў і іх блакіравання. Таму што яны хочуць расхістаць сітуацыю знутры. І цяпер людзі павінны разумець, што залог бяспекі Беларусі, таго, што мы будзем жыць спакойна, - гэта ўнутраная стабільнасць. Калі яшчэ і ўнутры расхістаем, то нічога добрага нас не чакае", - канстатаваў ён.-0-
