26 студзеня, Мінск /Кар. БЕЛТА/. Еўрапарламент ператварыўся ў бюракратычны кабінет, дзе строчаць нікому не патрэбныя рэзалюцыі, заявіў журналістам намеснік старшыні Пастаяннай камісіі па міжнародных справах Палаты прадстаўнікоў, старшыня Ліберальна-дэмакратычнай партыі Беларусі Алег Гайдукевіч, каменціруючы прыняцце Еўрапейскім парламентам рэзалюцыі "Аб стварэнні трыбунала па справе аб агрэсіі супраць Украіны", перадае карэспандэнт БЕЛТА.
"Мы прывыклі ўжо да гэтых паперак, якія яны строчаць, якія не маюць юрыдычнай сілы і з'яўляюцца прапагандысцкімі дакументамі і ні на што не ўплываюць. Чарговы дакумент быў прысвечаны таму, што яны сабраліся ствараць нейкі трыбунал для суда над Расіяй і Беларуссю за нібыта нейкую агрэсію, - сказаў Алег Гайдукевіч. - Дык вось, першае - ніякай юрыдычнай сілы гэтыя дакументы не маюць, ніякія трыбуналы ў абход Савета Бяспекі ААН ствараць немагчыма. Другое - сам Еўрапарламент ператварыўся ў нейкі бюракратычны кабінет, дзе строчаць толькі нікому не патрэбныя рэзалюцыі".
Трыбунал патрэбны не ў адносінах да нас, адзначыў дэпутат. "Трыбунал патрэбны за тое, што зрабілі з Іракам, Лівіяй, Югаславіяй. За тое, што цяпер замест таго, каб пасадзіць за стол перагавораў бакі і зрабіць хутчэй мір ва Украіне (аб чым гаворыць Беларусь і наш Прэзідэнт), туды пастаўляюць зброю, танкі і развязваюць далей вайну, - падкрэсліў ён. - Вось такі трыбунал патрэбны. Я думаю, рана ці позна народы, якія жывуць у Еўропе, разбяруцца з гэтымі палітыкамі, якія замест таго, каб займацца праблемамі ўласных краін, пішуць чарговыя паперкі ў адрас Беларусі, атрымліваючы за гэта немаленькія грошы ад сваіх падаткаплацельшчыкаў".
"Беларусь застаецца адкрытай для дыялогу з усімі краінамі Еўрапейскага саюза, - канстатаваў Алег Гайдукевіч. - Мы і цяпер вядзём дыялог са многімі палітыкамі і парламентарыямі. Але мы ніколі не пацерпім націску, дыктату. Чарговая рэзалюцыя Еўрапарламента - гэта чарговая паперка, якая будзе ляжаць у сметніцы. Таму што гэта не мае ні юрыдычнай сілы, ні палітычных вынікаў".-0-
