Сцяг Нядзеля, 21 красавіка 2024
Усе навіны
Усе навіны
Палітыка
24 лютага 2023, 15:15

"Еўрапейскія палітыкі ператварыліся ў клоўнаў і фрыкаў". Гайдукевіч аб правакацыях на пасяджэнні ПА АБСЕ

24 лютага, Мінск /Кар. БЕЛТА/. Еўрапейскія палітыкі ператварыліся ў клоўнаў і фрыкаў, заявіў карэспандэнту БЕЛТА намеснік старшыні Пастаяннай камісіі па міжнародных справах Палаты прадстаўнікоў, старшыня Ліберальна-дэмакратычнай партыі Беларусі Алег Гайдукевіч, каменціруючы правакацыі ўкраінскай дэлегацыі падчас выступлення дэпутата Палаты прадстаўнікоў Андрэя Савіных на пасяджэнні Агульнага камітэта па палітычных пытаннях і бяспецы ПА АБСЕ.

"Увогуле міжнародныя структуры ствараліся ў свой час для таго, каб гэта была пляцоўка для дыялогу. Каб людзі з рознымі пунктамі гледжання, нават з дыяметральна процілеглымі ўмелі чуць адзін аднаго і слухаць дзеля ўсяго чалавецтва. На гэтых прынцыпах, дарэчы, фарміравалася ў тым ліку і ААН. На жаль, цяпер мы бачым дэградацыю гэтых інстытутаў. Калі некаторыя еўрапейскія палітыкі, як учора ў час выступлення беларускай дэлегацыі на сесіі ПА АБСЕ, з палітыкаў ператварыліся ў клоўнаў, фрыкаў і займаюцца ўласным піярам замест таго, каб сапраўды вырашаць праблемы міру і вайны", - сказаў Алег Гайдукевіч.

Страшна і сорамна на гэта глядзець, адзначыў дэпутат. "Таму што на самай справе ідзе вайна, гінуць людзі кожны дзень. Замест таго каб сесці за стол перагавораў (як Беларусь і наша дэлегацыя гаворыць) і выпрацаваць нейкія пункты рашэння, яны мала таго што пастаўляюць зброю, развязваюць вайну, дык яшчэ і арганізуюць цыркавыя паказы, дыскрэдытуючы і міжнародныя арганізацыі цалкам і самі сябе. А якія могуць быць у іх аргументы пасля беларускай пазіцыі? Сказаць жа супраць няма чаго. Таму ў адказ ідзе хамства і самапіяр. На жаль, гэта сёння так", - адзначыў дэпутат.

"Але ўсё роўна беларускі голас, праўду нашу было чуваць, і хто хацеў яе пачуць - пачуў. Добра, што мы выступаем і даносім сваю пазіцыю", - канстатаваў Алег Гайдукевіч.

Беларуская дэлегацыя прымае ўдзел у пасяджэнні ПА АБСЕ ў Вене. Яе ўзначальвае старшыня Пастаяннай камісіі па міжнародных справах Палаты прадстаўнікоў Андрэй Савіных. Напярэдадні беларуская дэлегацыя прыняла ўдзел у мерапрыемствах першага дня 22-га зімовага пасяджэння асамблеі: сумесным пасяджэнні трох агульных камітэтаў, а таксама пасяджэннях Агульнага камітэта па палітычных пытаннях і бяспецы, па эканамічных пытаннях, навуцы, тэхналогіі і навакольным асяроддзі і па дэмакратыі, правах чалавека і гуманітарных пытаннях. Нягледзячы на правакацыі ўкраінскай дэлегацыі, Андрэю Савіных удалося выступіць на пасяджэнні Агульнага камітэта па палітычных пытаннях і бяспецы.-0-

Падпісвайцеся на нас у
Twitter
Топ-навіны
Свежыя навіны Беларусі