ДЗЯРЖОРГАНЫДЗЯРЖОРГАНЫ
Флаг Субота, 3 снежня 2022
Мінск Суцэльная воблачнасць -7°C
Усе навіны
Усе навіны
Палітыка
01 жніўня 2022, 16:07

Ермаловіч: эканамічнае супрацоўніцтва часам становіцца ахвярай палітычных рашэнняў

Максім Ермаловіч
Максім Ермаловіч

1 жніўня, Мінск /Кар. БЕЛТА/. Эканамічнае супрацоўніцтва часам становіцца ахвярай палітычных рашэнняў. Гэта адзначыў журналістам Максім Ермаловіч, які назначаны намеснікам кіраўніка Адміністрацыі Прэзідэнта Рэспублікі Беларусь, перадае карэспандэнт БЕЛТА.

"Эканамічнае супрацоўніцтва часам становіцца ахвярай палітычных рашэнняў, што, уласна, і адбылося ў адносінах Беларусі і Вялікабрытаніі", - сказаў Максім Ермаловіч, які да гэтага працаваў паслом нашай краіны ў Вялікабрытаніі.

Максім Ермаловіч падкрэсліў, што на новай пасадзе будзе займацца пытаннямі эканамічнай накіраванасці: "Эканоміка краіны застаецца прыярытэтам і галоўнай задачай, заўсёды кіраўнік дзяржавы аб гэтым гаварыў - займацца эканомікай. Калі ў краіне эфектыўная эканамічная сістэма, гэта вырашае ўсе іншыя праблемы, таму што эканоміка - гэта сапраўды базіс".

"Мая задача на новай пасадзе - прымяніць свае вопыт і веды, атрыманыя і ў фінансавай сістэме, і на нядаўняй пасадзе пасла Беларусі ў Вялікабрытаніі, і прымяніць іх для павышэння эфектыўнасці работы ўсёй эканамічнай сістэмы", - падкрэсліў Максім Ермаловіч.

Ён адзначыў, што напрацаваныя сувязі з Вялікабрытаніяй выкарыстоўваць будзе складана з-за той пазіцыі, якую заняў урад гэтай краіны. "Хоць трэба прызнаць, што беларуская прадукцыя запатрабавана ў Вялікабрытаніі і прымаецца спажыўцамі ў гэтай краіне як па якасці, так і па цане. Але эканамічнае супрацоўніцтва часам, на жаль, становіцца ахвярай палітычных рашэнняў, што і адбылося ў нашых адносінах са Злучаным Каралеўствам. Гэта сумна, таму што шмат было зроблена, каб гэтыя нашы ўзаемаадносіны развіваліся, каб абедзве краіны атрымлівалі выгады ад узаемнага гандлю і ад супрацоўніцтва ў інвестыцыйнай сферы", - прадоўжыў дыпламат.

Ён таксама канстатаваў: "На жаль, апошнія два гады сітуацыя развівалася ў адваротны бок і даводзілася вырашаць даволі складаныя задачы, звязаныя з санкцыямі, якія ўводзіліся ЕС і Вялікабрытаніяй, і цяпер даводзіцца працаваць ва ўмовах, калі гэтыя санкцыі дзейнічаюць. Думаю, што мой вопыт работы з процідзеяннем гэтым санкцыям таксама будзе запатрабаваны".

Максім Ермаловіч падкрэсліў, што беларуская эканоміка сёння знаходзіцца пад націскам гэтых санкцый і неабходна прымаць аператыўныя рашэнні. "Сумесна з урадам мы павінны выпрацоўваць хутка і якасна тыя рашэнні, якія будуць павышаць эфектыўнасць усёй эканамічнай сістэмы", - рэзюмаваў ён.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі