14 лістапада, Мінск /Кар. БЕЛТА/. Эквадор зацікаўлены ў прадаўжэнні супрацоўніцтва з Беларуссю ў нафтаздабычы і падрыхтоўцы новых праектаў. Аб гэтым было заяўлена на сустрэчы пасла Беларусі ў Эквадоры Мікалая Аўсянкі з кіраўніком Адміністрацыі Прэзідэнта Эквадора Хасэ Агуста Брыёнесам, паведамілі БЕЛТА ў прэс-службе МЗС Беларусі.
Мікалай Аўсянка акцэнтаваў зацікаўленасць беларускага боку ў развіцці канструктыўных і дынамічных адносін з Эквадорам у палітычнай і эканамічнай сферах, а таксама ў галіне культуры і турызму. Пасол Беларусі адзначыў неабходнасць паступальнага прадаўжэння работы па нарошчванні і дыверсіфікацыі ўзаемнага гандлю з улікам значных перспектыў па рэалізацыі існуючых сумесных праектаў у сферы нафтаздабычы, а таксама па наладжванні супрацоўніцтва ў галіне машынабудавання, геолагаразведкі, здабычы карысных выкапняў, інфармацыйных тэхналогій.
Пасол таксама прапанаваў актывізаваць механізм беларуска-эквадорскай камісіі па гандлёва-эканамічным супрацоўніцтве, чарговае пасяджэнне якой плануецца правесці ў Мінску.
У сваю чаргу Хасэ Агуста Брыёнес адзначыў, што эквадорскі бок зацікаўлены ў прадаўжэнні ўзаемавыгаднага супрацоўніцтва ў сферы нафтаздабычы і падрыхтоўцы новых сумесных праектаў у сферы сельскай гаспадаркі і высокіх тэхналогій.-0-