15 красавіка, Мінск /Кар. БЕЛТА/. Гістарычная палітыка Беларусі ўвязана з інфармацыйным нейтралітэтам. Абодва гэтыя паняцці знайшлі адлюстраванне ў Канцэпцыі інфармацыйнай бяспекі, прынятай у Беларусі ў мінулым годзе. Такім назіраннем у час чарговага пасяджэння праекта "Экспертнае асяроддзе" - "Гістарычная палітыка. Памяць аб вайне" ў прэс-цэнтры БЕЛТА падзяліўся аналітык Беларускага інстытута стратэгічных даследаванняў Ігар Валахановіч.
Аналітык растлумачыў, што інфармацыйны нейтралітэт не роўны пасіўнасці, жаданню адседзецца. "Гэта немагчымасць выкарыстоўваць нашу інфармацыйную прастору як пляцоўку для правядзення агрэсіўных дзеянняў", - сказаў ён. Ігар Валахановіч звярнуў увагу, што ў суседніх краінах гістарычная палітыка "мае часам дакучлівы характар, калі праз свой гістарычны наратыў яны спрабуюць навязаць нейкія ідэі і інтэграваць іх у інфармацыйную плоскасць".
Такі пункт гледжання аналітык БІСД выказаў, апаніруючы члену Пастаяннай камісіі Палаты прадстаўнікоў па адукацыі, культуры і навуцы Сяргею Клішэвічу, які лічыць, што гістарычная палітыка Беларусі мае абарончы характар. "Гістарычная палітыка сумежных дзяржаў мае наступальны характар, яны стараюцца ўплываць на нас і іншыя суседнія краіны. Мы ж па большай частцы апраўдваемся за нейкія факты, якія нам спрабуюць навязаць сёння. Нейкіх укідаў у інфармпрастору суседніх дзяржаў з нашага боку няма, такой задачы мы перад сабой не ставім", - адзначыў дэпутат.
Ён выказаў занепакоенасць, што праз сацыяльныя сеткі, тэлеграм-каналы аказваецца ўплыў на беларускую моладзь. "Ужо, напэўна, настае час, калі нам трэба таксама думаць над тым, як больш жорстка абараняцца. Не дапускаць якіх-небудзь чужых ідэй, якія сапраўды ўплываюць на моладзь, а значыць, на нашу будучыню", - лічыць парламентарый.-0-
