3 снежня, Мінск /Кар. БЕЛТА/. Прафесар Белдзяржуніверсітэта эканаміст Міхаіл Кавалёў расказаў газеце "СБ. Беларусь сегодня" аб магчымых варыянтах адказу Беларусі на санкцыі краін Захаду, паведамляе БЕЛТА.
"Калі санкцыйная палітыка прадоўжыцца, у адказ мы можам увесці санкцыі на пастаўкі еўрапейскіх тавараў у Беларусь. Цана пытання - мільярды долараў. І гэта значны ўрон еўрапейскаму бізнесу і тым беларусам (а такіх цяпер шмат), якія працуюць у розных дылерскіх і аналагічных кампаніях, прадаючы тут тавары - ад сыроў і віскі да фарбаў. Украіна таксама далучылася да антыбеларускіх санкцый. Што ж, Мазырскі НПЗ працуе фактычна на ўкраінскі рынак. Усё, пачынаючы ад аўтамабіляў кіраўніцтва гэтай краіны і заканчваючы ўкраінскімі танкамі, запраўляецца беларускай "гаручкай". А калі мы перастанем пастаўляць нафтапрадукты ва Украіну? Так, рабочыя НПЗ пацерпяць, але ў цэлым наша краіна гэтага манеўру практычна не заўважыць. Крыху зменшыцца сума падаткаў, якія паступаюць з Мазырскага НПЗ у бюджэт, - запэўнівае Міхаіл Кавалёў. - Што датычыцца балтыйскіх краін, якія ідуць нават наперадзе Еўрасаюза і першымі ўводзяць супраць нас палітычныя санкцыі, то хачу адзначыць, што эканамічных абмежаванняў супраць Беларусі яны ніколі не прымянялі. Паколькі разумеюць, што атрымаюць адэкватны адказ. Напрыклад, у выглядзе пераарыентацыі грузаў з партоў на расійскі напрамак. Вядома, гэта запатрабуе часу і будзе менш выгадным для нас, але страты для іх будуць куды больш значнымі. Акрамя таго, вы ж ведаеце рашучасць нашага Прэзідэнта. Калі эканамічныя санкцыі супраць Беларусі будуць істотнымі, ён можа даць каманду, напрыклад, перакрыць нафтаправод і газаправод напярэдадні зімы. "Паўночны паток - 2" яшчэ не пабудаваны. Таму я не думаю, што санкцыі супраць нас у выніку будуць настолькі істотнымі, як гэта абмяркоўваецца".
На думку прафесара, эканамічныя санкцыі (гэтак жа і заклікі да забастовак) прызначаны выклікаць у насельніцтва незадаволенасць уладай. "Але я думаю, людзі пачынаюць ужо разумець, што вось гэтыя чатыры месяцы палітычнай нестабільнасці наносяць такі ўрон беларускай эканоміцы, а значыць, беларускаму дабрабыту, што міне яшчэ пару месяцаў і людзі будуць успамінаць дваццаць апошніх гадоў як лепшыя свае гады ў эканамічным плане", - лічыць Міхаіл Кавалёў.
Ён таксама ўпэўнены, што галоўная мэта Літвы і Польшчы - вырваць Беларусь з саюза з Расіяй і замкнуць ланцуг з Малдовы і Украіны, дабавіўшы Беларусь. "Гэты ланцуг павінен ізаляваць Расію. Наша ж мэта - стаць не варожым Расіі ізалятарам, а мостам паміж ЕС і Еўразійскім эканамічным саюзам", - рэзюмуе эканаміст.-0-
