5 красавіка, Масква /Эдуард Півавар - БЕЛТА/. Дзярждума Расіі сёння на пленарным пасяджэнні ратыфікавала пратакол аб унясенні змяненняў у пагадненне аб міратворчай дзейнасці Арганізацыі Дагавора аб калектыўнай бяспецы ад 6 кастрычніка 2007 года, перадае карэспандэнт БЕЛТА.
Прадстаўляючы дакумент на ратыфікацыю, намеснік кіраўніка МЗС Расіі Аляксандр Панкін растлумачыў, што пратакол нацэлены на магчымасць арганізацыі ўдзелу міратворчых сіл АДКБ у аперацыях пад эгідай ААН. Дакументам уводзіцца паняцце "каардынуючая дзяржава". Прадугледжваецца, што пад эгідай гэтай дзяржавы калектыўныя міратворчыя сілы АДКБ могуць прымяняцца ў аперацыях ААН па падтрыманні міру.
Намеснік кіраўніка МЗС РФ падкрэсліў, што пратакол не ўводзіць абавязак удзелу міратворцаў АДКБ у аперацыях ААН па падтрыманні міру. Канчатковае рашэнне аб магчымасці ўдзелу ў такіх аперацыях застаецца за кожнай дзяржавай АДКБ паасобку.
Гэты пратакол быў падпісаны кіраўнікамі дзяржаў АДКБ 16 верасня 2021 года ў Душанбэ.-0-