8 ліпеня, Мінск /Кар. БЕЛТА/. Выхад Беларусі з ініцыятывы "Усходняе партнёрства" - гэта сур'ёзны іміджавы ўдар для Еўрапейскага саюза. Такое меркаванне газеце "СБ. Беларусь сегодня" выказаў палітычны аналітык Аляксей Дзермант, паведамляе БЕЛТА.
"Беларусь прыпыняе свой удзел у ініцыятыве ЕС "Усходняе партнёрства". Гэта зусім лагічны і адэкватны крок пасля таго, як мы атрымалі ад ЕС некалькі пакетаў эканамічных санкцый. Для нашай краіны ўдзел у такіх ініцыятывах страчвае ўсялякі сэнс. Беларусь бачыла ва "Усходнім партнёрстве" магчымасць сумеснага вырашэння агульных задач: Еўропу ахапілі патокі незаконнай міграцыі, якія ў тым ліку ідуць туды і праз нашу краіну. Але цяжар абароны меж ЕС павінен ляжаць не толькі на нас, бо не мы з'яўляемся канчатковай мэтай гэтых патокаў. І праграмы ініцыятывы дазвалялі ствараць неабходную інфраструктуру для надзейнай аховы граніцы і мытнага кантролю. Ва ўсялякім выпадку, Беларусь імкнулася прыўнесці сваім удзелам і бачаннем менавіта канкрэтную практычную карысць", - адзначыў аналітык.
Паводле яго слоў, беларускія дыпламаты не раз заяўлялі аб тым, што самае важнае ў гэтым праекце - эканамічнае супрацоўніцтва, інвестыцыі, а не геапалітычныя праекцыі або прасоўванне "еўрапейскіх каштоўнасцей", што залішняя палітызацыя загубіць праект і зробіць яго адыёзным. Што ў выніку і стала адбывацца.
"Еўрапейскія палітыкі (асабліва з усходняй часткі ЕС, дзе да гэтага часу шмат нявыкараненых комплексаў) бачылі ва "УП" зусім іншае - механізм уплыву на ўнутрыпалітычную сітуацыю ў краінах - удзельніцах гэтай ініцыятывы, магчымасць прасоўвання геапалітычных інтарэсаў Захаду насуперак інтарэсам Расіі або саміх дзяржаў, уключаных у гэты праект. Відавочна, што так доўга прадаўжацца не магло. Беларусь не тая дзяржава, якая дазволіць крывадушна з сабой іграць, - упэўнены Аляксей Дзермант. - Стала зразумела, што, напрыклад, падтрымка так званай грамадзянскай супольнасці ў рамках ініцыятывы на справе паварочваецца падрыўной дзейнасцю з мэтай звяржэння дзяржаўнай улады, спансіраваннем дэструктыўных сіл, якія ў гадзіну ікс як па камандзе пачынаюць расхістваць сітуацыю ў грамадстве".
Эксперт лічыць, што выхад Беларусі з ініцыятывы - гэта сур'ёзны іміджавы ўдар для ЕС. "Ва ўсякім выпадку, па тых краінах, якія яго актыўна падтрымлівалі і бачылі ў ім перспектыву пашырэння еўрапейскіх інтарэсаў на Усходзе. І адказнасць за фактычны правал гэтага праекта ляжыць на плячах тых еўрапейскіх палітыкаў, якія з-за сваіх амбіцый і памылковых уяўленняў аб рэальнасці не змаглі зрабіць з яго рэальны інструмент добрасуседства і ўзаемавыгаднага супрацоўніцтва. Беларусь, праяўляючы добрую волю і шчырае імкненне да наладжвання нармальных адносін з заходнімі суседзямі, доўгі час прыглядалася да таго, што і як прапануе Еўропа, - нагадвае Аляксей Дзермант. - Імкнулася накіраваць яе ініцыятывы ў канструктыўнае, карыснае рэчышча. Паводзіла сябе паважліва і дыпламатычна, але ў Еўрасаюзе гэтага не ацанілі. Як толькі выдалася падстава, там успомнілі ўсе свае дзікія прадузятыя погляды і неабгрунтаваныя прэтэнзіі да нашай краіны. А калі так, то Беларусь адказваць будзе гэтак жа - нам становяцца няважнымі праекты, дзе нашымі інтарэсамі пагарджаюць. Мы выходзім з "Усходняга партнёрства", якое без нас аказваецца правальным і бесперспектыўным. Еўропа ўсё зрабіла для гэтага".-0-
