1 снежня, Мінск /Кар. БЕЛТА/. Пасол Беларусі ў Егіпце Сяргей Цярэнцьеў сустрэўся з губернатарам Паўднёвага Сіная Халедам Фуда. Аб гэтым карэспандэнту БЕЛТА расказалі ў пасольстве Беларусі ў Егіпце.
На перагаворах была адзначана зацікаўленасць бакоў у развіцці міжрэгіянальных сувязей у эканоміцы, турызме, адукацыі, медыцыне, культуры і спорце. Пасол праінфармаваў аб стане беларуска-егіпецкага супрацоўніцтва, а таксама аб планах правесці ў пачатку 2021 года ў Егіпце двухбаковыя мерапрыемствы для актывізацыі турыстычнага абмену.
Губернатар пацвердзіў гатоўнасць прыняць у 2021 годзе ў Шарм-эль-Шэйху беларускую дэлегацыю ў час Дзён Мінскай вобласці ў Паўднёвым Сінай. Бакі дамовіліся ў бліжэйшыя месяцы зрабіць канкрэтныя крокі для актывізацыі супрацоўніцтва ў санаторным аздараўленні, перадачы беларускага вопыту і тэхналогій у сферы фізіятэрапіі і бальнеалагічнага лячэння, медыцыне, уключаючы супрацоўніцтва па лініі Міжнароднага шпіталя Шарм-эль-Шэйха і медыцынскай установы Мінскай вобласці.
Акрамя таго, абмяркоўваліся ўсталяванне партнёрскіх сувязей па лініі вядучых ВНУ, развіццё гандлёвых кантактаў паміж рэгіёнамі, культурны абмен.-0-
