15 сакавіка, Мінск /Аліна Грышкевіч - БЕЛТА/. Для беларусаў кошт шэнгенскіх віз пасля падпісання адпаведных пагадненняў з ЕС можа знізіцца да 35 еўра. Аб гэтым паведамілі карэспандэнту БЕЛТА ў прадстаўніцтве Еўрапейскага саюза ў Беларусі, каменціруючы прапанаваныя Еўракамісіяй візавыя змяненні.
"Прапанаваныя Еўрапейскай камісіяй змяненні візавай палітыкі разгледзяць Еўрапейскі парламент і Савет Еўрапейскага саюза, - падкрэслілі ў прадстаўніцтве ЕС. - Каб правілы былі прыняты на заканадаўчым узроўні, з імі павінны пагадзіцца абодва гэтыя інстытуты, а пакуль візавы збор застаецца ранейшым, інакш кажучы 60 еўра. Магчымае павелічэнне візавага збору ніяк не закране трэція краіны, якія падпісалі пагадненні аб спарашчэнні візавага рэжыму з ЕС (Расія, Арменія, Азербайджан)".
У прадстаўніцтве нагадалі, што ў 2011 годзе Еўрапейская камісія атрымала мандат на вядзенне перагавораў аб заключэнні пагаднення аб спрашчэнні візавага рэжыму з Беларуссю, які ўстанаўлівае агульны візавы збор на ўзроўні 35 еўра. Калі Беларусь і Еўрапейскі саюз падпішуць пагадненні аб спрашчэнні візавага рэжыму, а таксама аб рэадмісіі, візавы збор будзе ўстаноўлены на ўзроўні 35 еўра.
Прычым абодва дакументы - пагадненне аб рэадмісіі і пагадненне аб спрашчэнні візавага рэжыму - уступаюць у сілу адначасова. На чацвёртым раўндзе перагавораў, які адбыўся ў Мінску ў чэрвені 2017 года, быў дасягнуты значны прагрэс у прапрацоўцы пагаднення аб рэадмісіі. Што датычыцца пагаднення аб спрашчэнні візавага рэжыму, засталося яшчэ некалькі пытанняў, якія неабходна ўзгадніць. Чакаецца, што наступны раўнд перагавораў адбудзецца ў Мінску ў бліжэйшыя месяцы.
Як расказалі ў прадстаўніцтве, Еўрапейская камісія 14 сакавіка прапанавала рэфармаваць агульную візавую палітыку ЕС. Улічваючы істотны рост затрат на апрацоўку візавых заяў за мінулыя гады, прадугледжана павелічэнне з 60 еўра да 80 еўра візавага збору, які не змяняўся з 2006 года. Гэта павелічэнне прызначана для таго, каб дзяржавы-члены маглі падтрымліваць неабходную колькасць консульскага персаналу ва ўсім свеце для забеспячэння эфектыўных праверак на адпаведнасць патрабаванням бяспекі, а таксама абнавіць інфармацыйна-тэхнічнае абсталяванне і праграмнае забеспячэнне без стварэння складанасцей для асоб, якія звяртаюцца за візай.
Прапанаваныя змяненні накіраваны на мадэрнізацыю і аптымізацыю правіл агульнай візавай палітыкі, спрашчэнне працэдуры выдачы віз як для законапаслухмяных падарожнікаў, так і дзяржаў-членаў, і ў той жа час на ўмацаванне стандартаў бяспекі візавай працэдуры. Так, тэрмін прыняцця рашэння па візавых заявах скароціцца з 15 да 10 дзён. Падарожнікі змогуць падаваць заявы за 6 месяцаў да плануемай паездкі замест цяперашніх трох месяцаў, запаўняць і падпісваць заявы ў электронным выглядзе. Адзіныя правілы будуць прымяняцца да шматразовых віз, каб скараціць затраты і сэканоміць час дзяржаў-членаў і тых, хто часта падарожнічае. Такія шматразовыя візы будуць выдавацца надзейным пастаянным падарожнікам са станоўчай візавай гісторыяй на тэрмін, які будзе паступова павялічвацца з аднаго года да пяці гадоў. Выкананне падарожнікамі ўмоў уезду будзе грунтоўна і пастаянна правярацца.
Пры гэтым каб садзейнічаць ажыццяўленню кароткачасовых турыстычных паездак, дзяржавы-члены змогуць выдаваць аднаразовыя візы непасрэдна на знешніх наземных і марскіх граніцах па часавых, сезонных схемах на строгіх умовах. Такія візы будуць дзейнічаць тэрмінам не больш за 7 дзён толькі на тэрыторыі выдаўшай візу дзяржавы-члена.-0-
