2 лютага, Мінск /Кар. БЕЛТА/. Адносіны Беларусі і Расіі - стратэгічныя, дружалюбныя, важныя, заявіла журналістам старшыня Камісіі Парламенцкага сходу Саюза Беларусі і Расіі па працы, сацыяльнай палітыцы і ахове здароўя, член Камітэта Савета Федэрацыі па міжнародных справах Алена Афанасьева, перадае карэспандэнт БЕЛТА.
Пасяджэнне Камісіі Парламенцкага сходу Саюза Беларусі і Расіі па працы, сацыяльнай палітыцы і ахове здароўя прайшло сёння ў Мінску. Да ўдзелу былі запрошаны прадстаўнікі Пастаяннага камітэта Саюзнай дзяржавы, міністэрстваў аховы здароўя і культуры Беларусі і Расіі, Мінскага абласнога выканаўчага камітэта, Беларускага пратэзна-артапедычнага аднаўленчага цэнтра, Беларускага дзяржаўнага медыцынскага ўніверсітэта, Арэнбургскага дзяржаўнага медыцынскага ўніверсітэта, а таксама Маладзёжнай палаты пры Парламенцкім сходзе Саюза Беларусі і Расіі.
Так, удзельнікі пасяджэння разгледзелі пытанне аб магчымасці прызнання сертыфікатаў Беларусі на сродкі рэабілітацыі для асоб з абмежаванымі магчымасцямі ў Расіі.
"Мы перыядычна вяртаемся да пэўных тэм, якія дазваляюць нам, сапраўды, пакрыху будаваць агульную прастору Саюзнай дзяржавы. Напрыклад, сёння мы разглядалі пытанне сертыфікацыі медыцынскіх вырабаў для асоб, якія маюць абмежаваныя магчымасці здароўя. Безумоўна, Расійская Федэрацыя і Рэспубліка Беларусь асаблівага дэфіцыту гэтых вырабаў на сваіх тэрыторыях не маюць. Але гэта важна. Калі мы будуем агульную Саюзную дзяржаву, то павінны не проста прызнаваць дыпломы студэнтаў адзін аднаго, але мы павінны прызнаваць сертыфікацыю пэўных вырабаў. Тут якраз ёсць такая заканадаўчая праблема, якую павінны ў тым ліку вырашыць дэпутаты Парламенцкага сходу Саюза Беларусі і Расіі, таму што мы прадстаўнікі заканадаўчых галін улады сваіх краін, - сказала Алена Афанасьева. - Мы сёння з калегамі з міністэрстваў аховы здароўя на гэту тэму паразмаўлялі. Ёсць некаторыя нюансы. Нашы калегі настойваюць, каб сертыфікацыя адбывалася ў рамках Еўразійскага эканамічнага саюза. Але мы лічым, што адносіны Беларусі і Расіі - гэта пэўныя стратэгічныя, дружалюбныя, важныя адносіны будаўніцтва Саюзнай дзяржавы, адпаведна, мы павінны знайсці падыходы такія, каб не было перашкод для перамяшчэння не толькі тавараў, людзей унутры Саюзнай дзяржавы, але і такіх неабходных медыцынскіх вырабаў для асоб з абмежаванымі магчымасцямі здароўя".
Акрамя таго, парламентарыям была прадстаўлена інфармацыя аб ходзе распрацоўкі новай праграмы Саюзнай дзяржавы па прафілактыцы і лячэнні дзяцей Беларусі і Расіі з хранічнымі захворваннямі нырак. "Калі мы былі ў Арэнбургскай вобласці, праводзілі пасяджэнне камісіі, то нашы калегі з дзвюх медыцынскіх ВНУ выйшлі з ініцыятывай аб распрацоўцы праграмы Саюзнай дзяржавы па абароне здароўя дзяцей, якія маюць хранічныя захворванні нырак. Яны вельмі сур'ёзна падышлі да распрацоўкі такой праграмы. Мы лічым, што кошт гэтай праграмы для нас невялікі і яна добра прапрацавана. Яна мае магчымасць на тое, каб быць прынятай і рэалізаванай у рамках Саюзнай дзяржавы. Раней захворванні нырак - гэта былі хваробы дарослых людзей. Цяпер пачынаюць усё часцей хварэць на хранічныя захворванні нырак дзеці. Таму лічым, што мы як камісія Парламенцкага сходу па ахове здароўя павінны гэту праграму падтрымаць і прапанаваць для разгляду і нашымі саюзнымі органамі, і ў тым ліку дэпутацкім корпусам", - дапоўніла яна.
2 і 3 лютага падчас візіту ў Мінск і Мінскую вобласць дэпутаты Парламенцкага сходу плануюць наведаць рэспубліканскае ўнітарнае прадпрыемства "Беларускі пратэзна-артапедычны аднаўленчы цэнтр", сустрэцца з дэпутатамі Мінскага аблвыканкама, азнаёміцца з работай сацыяльных устаноў.-0-
