8 лютага, Мінск /Кар. БЕЛТА/. Дэлегацыя Пакістана плануе наведаць Беларусь у 2022 годзе, заявіла журналістам намеснік старшыні Пастаяннай камісіі па міжнародных справах Палаты прадстаўнікоў Вольга Петрашова, перадае карэспандэнт БЕЛТА.
"Сёння на пасяджэнні Савета Палаты прадстаўнікоў разгледжаны і зацверджаны план міжнароднага парламенцкага супрацоўніцтва на 2022 год. Міжпарламенцкае супрацоўніцтва ажыццяўляецца па некалькіх напрамках. Адзін з іх - работа ў міжнародных парламенцкіх арганізацыях. Сёння парламент Беларусі з'яўляецца паўнапраўным членам у сямі міжнародных парламенцкіх арганізацыях і ў трох мае статус наглядальніка", - расказала Вольга Петрашова.
Дэпутат падкрэсліла, што актыўна развіваецца двухбаковае супрацоўніцтва з парламентамі замежных краін. "У гэтым годзе плануюцца візіты парламенцкіх дэлегацый нашай краіны і дэлегацый на ўзроўні рабочых груп Нацыянальнага сходу Беларусі па супрацоўніцтве з парламентамі такіх дзяржаў, як Егіпет, Іран, Рэспубліка Карэя, Таджыкістан. Таксама ў 2022 годзе плануецца афіцыйны візіт у Беларусь дэлегацыі Ісламскай Рэспублікі Пакістан, - адзначыла яна. - У бягучым годзе ў нашай краіне будзе праведзена 13-е пасяджэнне міжпарламенцкай камісіі па супрацоўніцтве Нацыянальнага сходу Беларусі з Нацыянальным сходам Арменіі".
Акрамя таго, будзе прадоўжана работа па супрацоўніцтве на ўзроўні рабочых груп з парламентарыямі замежных дзяржаў. "Напрыклад, у лютым будуць праведзены сустрэчы кіраўнікоў і членаў рабочых груп парламентаў Беларусі і Бразіліі, а таксама парламентаў Беларусі і В'етнама. Адным з важных напрамкаў дзейнасці з'яўляецца будаўніцтва адносін з асноўнымі стратэгічнымі партнёрамі нашай краіны - Расійскай Федэрацыяй і Кітайскай Народнай Рэспублікай", - дапоўніла Вольга Петрашова.-0-
