15 снежня, Мінск /Кар. БЕЛТА/. Прынятыя ЕС санкцыйныя дакументы закранаюць правы і свабоды грамадзян, заявіла журналістам суддзя Канстытуцыйнага суда Ала Бодак пасля агучвання рашэння Канстытуцыйнага суда па справе "Аб адпаведнасці агульнапрызнаным прынцыпам і нормам міжнароднага права дакументаў, прынятых (выдадзеных) Еўрапейскім саюзам і некаторымі замежнымі дзяржавамі і іх органамі, якія прадугледжваюць увядзенне абмежавальных мер у адносінах да Рэспублікі Беларусь", перадае карэспандэнт БЕЛТА.
"Канстытуцыйны суд лічыць, што абмежавальныя меры, якія змяшчаюцца ў дакументах Еўрапейскага саюза і некаторых замежных дзяржаў, пэўным чынам закранаюць правы і свабоды грамадзян", - сказала Ала Бодак.
Размова ідзе аб сацыяльных, эканамічных, грамадзянскіх правах. "У прыватнасці, права на ўласнасць, на свабоду перамяшчэння, на эканамічную дзейнасць, на свабоду выказвання думак, на свабоднае развіццё асобы. У гэтым кантэксце Канстытуцыйны суд у рэзалютыўнай частцы свайго рашэння па гэтай справе зрабіў адназначную выснову аб тым, што дакументы, прынятыя Еўрапейскім саюзам і некаторымі замежнымі дзяржавамі, якія прадугледжваюць увядзенне абмежавальных мер у адносінах да Рэспублікі Беларусь, не адпавядаюць агульнапрызнаным прынцыпам міжнароднага права. У прыватнасці, прынцыпу суверэннай роўнасці і неўмяшання ва ўнутраныя справы дзяржавы, прынцыпу супрацоўніцтва дзяржаў у адпаведнасці са статутам, прынцыпу добрасумленнага выканання абавязацельстваў, прынцыпу павагі правоў і свабод грамадзян, прадугледжаных Статутам ААН, Хартыяй эканамічных правоў і абавязкаў дзяржаў, Дэкларацыяй аб прынцыпах міжнароднага права. Акрамя таго, гэтыя дакументы не адпавядаюць агульнапрызнаным прынцыпам і нормам міжнароднага права ў галіне правоў чалавека, супярэчаць гл. 6 і 7 Статута ААН, якія прадугледжваюць механізм увядзення прэвентыўных і прымусовых мер у адносінах да дзяржаў толькі па рашэнні Савета Бяспекі ААН выключна ў мэтах падтрымання міжнароднага міру і бяспекі", - дадала суддзя Канстытуцыйнага суда.-0-
