11 ліпеня, Мінск /Кар. БЕЛТА/. Пастаянны прадстаўнік Беларусі пры аддзяленні ААН у Жэневе Ларыса Бельская назвала рэзалюцыю Савета па правах чалавека ЕС па сітуацыі з правамі чалавека ў Беларусі беспрынцыпным умяшаннем ва ўнутраныя справы суверэннай дзяржавы. Аб гэтым БЕЛТА паведамілі ў Пастаянным прадстаўніцтве Беларусі пры аддзяленні ААН у Жэневе.
Там удакладнілі, што Савет па правах чалавека ў ходзе сваёй 50-й сесіі разгледзеў чарговы палітызаваны праект рэзалюцыі па сітуацыі з правамі чалавека ў Беларусі, унесены Еўрапейскім саюзам і яго партнёрамі. "Гэта ініцыятыва была пастаўлена на галасаванне і ў выніку яе не падтрымала больш за палову членаў савета, тым самым прадэманстраваўшы сваю нязгоду з ацэнкамі і падыходамі заходніх краін у адносінах да Беларусі", - адзначылі ў пастаянным прадстаўніцтве.
Ларыса Бельская ахарактарызавала рэзалюцыю ЕС як беспрынцыпнае ўмяшанне ва ўнутраныя справы суверэннай дзяржавы. "Беларускі дыпламат заявіла, што палажэнні рэзалюцыі нацэлены на замоўчванне і скажэнне рэальнай сітуацыі ў Беларусі і дзяржаўнай палітыкі па падтрыманні розных катэгорый правоў чалавека. У процівагу гэтаму рэзалюцыя прапагандуе і заахвочвае ўсе практыкі і структуры, якія мэтанакіравана працуюць на дыскрэдытацыю дзяржавы, уключаючы дзеючыя ў краінах ЕС маргінальныя групы т.з. апазіцыі, якія знаходзяцца на ўтрыманні сваіх заходніх спонсараў", - праінфармавалі ў пастаянным прадстаўніцтве.
Дыпламат таксама раскрытыкавала заходнія краіны за тое, што менавіта яны сваёй незаконнай санкцыйнай палітыкай і разбурэннем міждзяржаўных кантактаў парушаюць правы беларусаў і грамадзян іншых краін. "Яна заявіла, што ўрад Беларусі не прызнае мандат спецыяльнага дакладчыка, які дзейнічае выключна ў рэчышчы інтарэсаў ЕС і ЗША і іх бачання развіцця беларускай дзяржавы, - адзначылі ў пастаянным прадстаўніцтве. - Ларыса Бельская падкрэсліла, што беларуская дзяржава абапіраецца на падтрымку большасці народа. Менавіта таму ў Беларусі не ўдалося рэалізаваць каляровую рэвалюцыю ў 2020 годзе, падарваць сацыяльную і эканамічную стабільнасць "пакетамі санкцый" у 2021 і 2022 гадах, расхістаць сітуацыю шляхам нарошчвання сістэмнай дэзынфармацыйнай работы супраць беларускага кіраўніцтва і санкцыйнага націску на краіну на фоне канфлікту ва Украіне. Яна адзначыла, што менавіта таму не працуюць ангажыраваныя рэзалюцыі, ініцыюемыя заходнімі дзяржавамі, якія не хочуць паважаць адрозненні паміж нашымі краінамі і прызнаваць выбар Беларуссю ўласнага шляху развіцця".-0-