ДЗЯРЖОРГАНЫДЗЯРЖОРГАНЫ
Флаг Аўторак, 7 лютага 2023
Мінск -3°C
Усе навіны
Усе навіны
Палітыка
15 лістапада 2022, 10:50

Беларускі дыпламат назваў праект рэзалюцыі ў ААН па Украіне спробай легалізаваць крадзеж чужых актываў

Фота з архіва
Фота з архіва

15 лістапада, Мінск /Кар. БЕЛТА/. Пастаянны прадстаўнік Беларусі пры ААН Валянцін Рыбакоў выступіў на 11-й надзвычайнай спецыяльнай сесіі Генеральнай асамблеі ААН, дзе абмяркоўваўся падрыхтаваны групай краін праект рэзалюцыі па пытанні "кампенсавання ўрону" Украіне, перадае карэспандэнт БЕЛТА.

Дыпламат заявіў, што Беларусь катэгарычна супраць працэдуры ўнясення прапануемага праекта рэзалюцыі. "Поўная адсутнасць інклюзіўнасці і транспарэнтнасці без правядзення якіх-небудзь кансультацый чарговы раз пераконвае нас у тым, што заходнія дзяржавы поўнасцю адмовіліся ад прынцыпаў шматбаковасці, добрасумленнасці і супрацоўніцтва ў ААН", - сказаў ён.

Валянцін Рыбакоў нагадаў, што Беларусь стаяла ля вытокаў як Мінскіх пагадненняў, так і комплексу мер па іх выкананні - Мінск-2. На працягу ўсяго канфлікту Беларусь рабіла ўсё магчымае для арганізацыі перагавораў паміж Расіяй і Украінай, забяспечваючы іх правядзенне ў ходзе сустрэч як на вышэйшым, так і на высокім узроўні, у тым ліку ў рамках трохбаковай кантактнай групы.

"Ці сапраўды заходнія дзяржавы, так званыя гаранты названых Мінскіх пагадненняў, жадалі ўрэгулявання сітуацыі? Адказ сёння, на жаль, цалкам відавочны, - канстатаваў дыпламат. - Адабрэнне дзяржаўнага перавароту ў 2014 годзе, правакаванне на працягу васьмі доўгіх гадоў эскалацыі канфлікту на Данбасе, падтрымка Украіны пры яе адмове выконваць Мінскія пагадненні, ператварэнне Украіны ў анты-Расію, забеспячэнне Украіны зброяй стварылі ўсе перадумовы для таго, каб абедзве краіны сталі адна для адной уяўляць фактычна экзістэнцыяльную пагрозу".

"Калектыўны Захад ніколі і не спрабаваў пераканаць Украіну выконваць Мінскія пагадненні. Заходнія дзяржавы - гаранты пагадненняў - не выканалі свае абавязацельствы. Калі б яны гэта зрабілі, мы сёння ў гэтай зале гэту праблему не абмяркоўвалі б", - падкрэсліў Валянцін Рыбакоў.

Паводле яго слоў, галоўная задача заходніх дзяржаў заключалася ў максімальным аслабленні Расіі і ў стварэнні ўмоў, пры якіх Расія ўжо не магла б не рэагаваць.

"Праект не вытрымлівае ніякай крытыкі з пункту гледжання міжнароднага права. Гэта ўсяго толькі спроба легалізаваць крадзеж чужых актываў. Гэта таксама вельмі добры, наглядны прыклад для ўсіх нас, для ўсіх тых, хто па-ранейшаму лічыць, што прыватная ўласнасць на Захадзе свяшчэнная", - заўважыў беларускі дыпламат.

Ён таксама звярнуў увагу, што праект не згадвае аб злачынствах, якія ўчыняліся каланіяльнымі дзяржавамі на працягу стагоддзяў, наступствах рабства, знішчэння цэлых народаў, якія пражывалі на захопленых тэрыторыях. "Ніхто і ніколі не выплачваў і не выплаціць ужо рэпарацыі, кампенсацыі краінам і народам за ўрон, які, дарэчы кажучы, не паддаецца ніякай ацэнцы, і за ўсе тыя пакуты, якія гэтыя краіны і народы перанеслі", - падкрэсліў Валянцін Рыбакоў.

У праекце няма ні слова і аб цяперашнім эканамічным тэрарызме - незаконных блакадах, незаконных санкцыях, спробах эканамічнага ўдушэння цэлых краін і народаў, канстатаваў дыпламат.

Ён нагадаў: нядаўна кіраўніцтва ААН адзначала, што вайна ва Украіне з'яўляецца сёння толькі адным з амаль 30 узброеных канфліктаў у свеце. "Генеральная асамблея не павінна рабіць выключэнне для аднаго канфлікту, якім бы цяжкім ён ні быў, не павінна ставіць яго вышэй за інтарэсы краін, якія сталі на шлях развіцця, што нясуць на сабе найбольш цяжкія наступствы войнаў, у тым ліку і тых, што вядуцца сёння, замежнага ўмяшання, рабства і каланіялізму", - сказаў Валянцін Рыбакоў.

Рэзюмуючы, ён зрабіў выснову, што прапанаваны дакумент ні на крок не наблізіць бакі да міру, а толькі яшчэ больш палярызуе. Таму Беларусь прагаласуе супраць праекта рэзалюцыі.-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі