26 кастрычніка, Мінск /Кар. БЕЛТА/. Беларуская дэлегацыя на чале са старшынёй Савета Рэспублікі Наталляй Качанавай накіравалася ва Узбекістан для ўдзелу ў сесіі Міжпарламенцкай асамблеі СНД. Аб гэтым БЕЛТА паведамілі ў прэс-службе верхняй палаты парламента.
Мерапрыемствы асенняй сесіі Міжпарламенцкай асамблеі дзяржаў - удзельніц СНД пройдуць у Самаркандзе 27-28 кастрычніка. У мерапрыемствах у вочным фармаце прымуць удзел кіраўнікі і члены парламенцкіх дэлегацый краін, якія ўваходзяць у МПА СНД, а таксама прадстаўнікі міжнародных арганізацый, вучоныя і эксперты.
27 кастрычніка пройдуць пасяджэнні пастаянных камісій асамблеі - па культуры, інфармацыі, турызме і спорце, па аграрнай палітыцы, прыродных рэсурсах і экалогіі, па палітычных пытаннях і міжнародным супрацоўніцтве. У гэты ж дзень маладыя парламентарыі краін Садружнасці збяруцца на пасяджэнне Маладзёжнай міжпарламенцкай асамблеі дзяржаў - удзельніц СНД.
Таксама 27 кастрычніка адбудзецца пасяджэнне кіруючага органа асамблеі - Савета МПА СНД. Кіраўнікі парламенцкіх дэлегацый абмяркуюць актуальныя пытанні супрацоўніцтва, падвядуць вынікі праведзеных у 2022 годзе мерапрыемстваў, заслухаюць інфармацыю аб маніторынгу выбарчых кампаній на прасторы СНД.
Пяцьдзясят чацвёртае пленарнае пасяджэнне Міжпарламенцкай асамблеі дзяржаў - удзельніц СНД адбудзецца 28 кастрычніка. Плануецца, што парламентарыі разгледзяць вялікі блок мадэльных законаў электаральнай тэматыкі. Дэпутатам і сенатарам таксама будзе прадстаўлены шэраг іншых законапраектаў, каб у далейшым яны маглі выкарыстоўваць іх у нацыянальных заканадаўствах краін Садружнасці.-0-
