3 сакавіка, Мінск /Кар. БЕЛТА/. Беларусь звяртае ўвагу на непрымальнасць і негатыўныя наступствы прымянення санкцый. Гэта адзначыў пастаянны прадстаўнік Беларусі пры ААН Валянцін Рыбакоў, выступаючы 2 сакавіка на заключнай частцы надзвычайнай спецыяльнай сесіі Генеральнай асамблеі ААН па пытанні Украіны, паведамляе БЕЛТА са спасылкай на беларускае МЗС.
"Выступаючы на мерапрыемстве, пастаянны прадстаўнік Беларусі пры ААН спыніўся на перадгісторыі падзей ва Украіне, уключаючы невыкананне Мінскіх пагадненняў, і адхіліў абвінавачанні ў адрас Беларусі, - гаворыцца ў паведамленні. - Ён асабліва падкрэсліў намаганні Прэзідэнта Рэспублікі Беларусь па арганізацыі дыялогу Расіі і Украіны, а таксама адзначыў непрымальнасць і негатыўныя наступствы прымянення санкцый, акцэнтаваў увагу на кампаніі Захаду па дэзынфармацыі, якая суправаджае канфлікт".
Акрамя таго, Валянцін Рыбакоў сказаў аб праблемах з выездам грамадзян з Украіны ў асобныя сумежныя дзяржавы і заклікаў да арганізацыі гуманітарнага калідора.
"Мы ўсе нясём сваю долю адказнасці за тое, што адбываецца цяпер ва Украіне. Восем гадоў таму былі падпісаны Мінскія пагадненні, Савет Бяспекі прыняў адпаведную рэзалюцыю. Ні Савет Бяспекі, ні Генеральная асамблея, ні міжнародная супольнасць у цэлым не змаглі пераканаць або прымусіць украінскія ўлады выконваць палажэнні гэтых дакументаў, - адзначыў пастаянны прадстаўнік Беларусі. - Усе гэтыя восем гадоў Украіна фактычна знаходзілася ў стане грамадзянскай вайны, паколькі кіеўскія ўлады не хацелі садзіцца за стол перагавораў са сваімі суграмадзянамі з Данецка і Луганска і адмаўляліся ўлічваць іх законныя інтарэсы". Ён падкрэсліў: усе гэтыя восем гадоў там гінулі людзі, у асноўным грамадзянскае насельніцтва - пажылыя, жанчыны, дзеці.
"Аператыўны параграф 8 праекта рэзалюцыі крывадушна заклікае ўсе бакі выконваць Мінскія пагадненні, - прадоўжыў ён. - Вельмі хочацца спытаць аўтараў і сааўтараў праекта рэзалюцыі: дзе вы былі? Чаму ж вы за восем гадоў так і не змаглі прымусіць Кіеў выканаць палажэнні гэтых дакументаў? Пад бесцырымонным націскам з боку ЗША, Канады, краін Еўрасаюза, якія, зразумела, лічаць сябе "эталонам дэмакратыі", апынуліся і ААН, і АБСЕ, і Савет Еўропы, і наогул уся міжнародная супольнасць, якія так і не знайшлі ў сабе сіл і мужнасці адэкватна адрэагаваць на злачынныя дзеянні ўкраінскіх улад".-0-
