13 верасня, Мінск /Кар. БЕЛТА/. Беларусь зацікаўлена ў актывізацыі парламенцкага супрацоўніцтва з В'ьетнамам, заявіў старшыня Савета Рэспублікі Нацыянальнага сходу Беларусі Міхаіл Мясніковіч на сустрэчы з паслом В'етнама ў Беларусі Ле Анем з нагоды завяршэння яго дыпламатычнай місіі, паведамілі БЕЛТА ў прэс-службе Савета Рэспублікі.
Міхаіл Мясніковіч адзначыў асабісты ўклад пасла ва ўмацаванне гандлёва-эканамічных і гуманітарных сувязей паміж краінамі. Асаблівую ўвагу бакі ўдзялілі развіццю міжпарламенцкіх кантактаў. "Беларусь зацікаўлена ў актывізацыі парламенцкага супрацоўніцтва з В'етнамам, пакуль двухбаковы патэнцыял выкарыстоўваецца не ў поўнай меры", - сказаў старшыня Савета Рэспублікі.
Ацэньваючы гандлёва-эканамічнае супрацоўніцтва, ён падкрэсліў, што сумесных беларуска-в'етнамскіх праектаў павінна быць больш.
У сваю чаргу Ле Ань акрэсліў найбольш перспектыўныя напрамкі ўзаемадзеяння. У іх ліку сферы машынабудавання, транспарту і лагістыкі, аграпрамысловы комплекс, інфармацыйна-камунікацыйныя тэхналогіі, хімічная галіна, адукацыя, турызм. У прыватнасці, В'етнам зацікаўлены ў падрыхтоўцы кадраў у ІТ-сферы ў Беларусі. "Ваша краіна шырока вядома сваімі дасягненнямі ў ІТ. Мы зацікаўлены ў партнёрстве ў гэтай галіне", - заявіў пасол.
У час сустрэчы абмяркоўваліся магчымасці нарошчвання паставак беларускіх прадуктаў харчавання на в'етнамскі рынак. У тым ліку размова ішла аб экспарце малочнай прадукцыі. Пасол прапанаваў разгледзець магчымасць удзелу арганізацый з Беларусі ў будаўніцтве метро ў В'етнаме.-0-