2 красавіка, Мінск /Святлана Саўко - БЕЛТА/. Беларусь разлічвае на тое, што супрацоўніцтва з Кітаем будзе напаўняцца новымі праектамі і ідэямі. Аб гэтым сёння заявіў старшыня Палаты прадстаўнікоў Уладзімір Андрэйчанка на сустрэчы з намеснікам старшыні Пастаяннага камітэта Усекітайскага сходу народных прадстаўнікоў Шэнь Юэюэ, перадае карэспандэнт БЕЛТА.
Уладзімір Андрэйчанка адзначыў, што адносіны дзвюх краін заўсёды будаваліся ў духу давернага ўзаемавыгаднага супрацоўніцтва і партнёрства. "Спадзяёмся, што добрыя традыцыі ў супрацоўніцтве захаваюцца, яно будзе напаўняцца новымі праектамі і ідэямі", - сказаў старшыня Палаты прадстаўнікоў.
У беларускім парламенце разлічваюць, што візіт кітайскай дэлегацыі на чале з намеснікам старшыні Пастаяннага камітэта Усекітайскага сходу народных прадстаўнікоў Шэнь Юэюэ паслужыць умацаванню адносін ва ўсіх сферах. "Задача для нас адна - павышэнне дабрабыту людзей, будаўніцтва ініцыятывы "Адзін пояс, адзін шлях", - сказала яна.
У сваю чаргу Шэнь Юэюэ падкрэсліла, што Кітай надае вялікае значэнне супрацоўніцтву з Беларуссю. "Мы гатовы бесперапынна працаваць у рамках рэалізацыі ініцыятывы "Адзін пояс, адзін шлях" на карысць народаў дзвюх краін", - сказала яна. Кіраўнік дэлегацыі адзначыла важнасць супрацоўніцтва парламентаў і прапанавала і ў далейшым актыўна рэалізоўваць дамоўленасці, дасягнутыя кіраўнікамі дзяржаў, умацоўваць прававую базу супрацоўніцтва, наладзіць маніторынг выканання ўжо заключаных пагадненняў. На думку Шэнь Юэюэ, неабходна ўзмацняць кантакты паміж беларускімі і кітайскімі парламентарыямі, паколькі яны могуць шмат чаму навучыцца адзін у аднаго, абмяняцца карысным вопытам.
Як адзначалася ў час сустрэчы, Беларусь і Кітай уважліва сочаць за развіццём сітуацыі адзін у аднаго і рады палітычным, эканамічным поспехам партнёраў. Парламенцкая дэлегацыя Кітая сёння будзе прысутнічаць на адкрыцці вясенняй сесіі Палаты прадстаўнікоў.-0-