19 лютага, Мінск /Аліна Грышкевіч - БЕЛТА/. Беларусь разглядае Сербію як надзейнага партнёра і надае вялікае значэнне развіццю беларуска-сербскіх адносін. Аб гэтым заявіў намеснік міністра замежных спраў Алег Краўчанка 18 лютага на мерапрыемстве з нагоды нацыянальнага свята Сербіі - Дня дзяржаўнасці, перадае карэспандэнт БЕЛТА.
Паводле слоў намесніка міністра, Дзень дзяржаўнасці Сербіі сімвалізуе не толькі векавое імкненне сербаў да незалежнасці, але і братэрства ўсіх славянскіх народаў, якія на працягу XIX-XX стагоддзяў вымушаны былі ў цяжкіх выпрабаваннях заваёўваць, а потым абараняць сваю Айчыну.
"Багатае гістарычнае мінулае, на старонках якога перыяды мірнага жыцця чаргаваліся з войнамі і ліхалеццем, дае магчымасць нам сёння казаць пра такія агульныях рысы характару нашых людзей, як працавітасць, пачуццё ўласнай годнасці, стойкасць перад пагрозамі і любоў да сваёй радзімы. Усе гэтыя рысы асабліва выразна праявіліся ў час Другой сусветнай вайны, калі беларусы і сербы мужна змагаліся з нацызмам. Мы шануем памяць беларусаў, якія ўдзельнічалі ў партызанскім руху на тэрыторыі Югаславіі. Мы добра памятаем таксама імёны амаль дзвюх соцень грамадзян былой Югаславіі, якія гераічна ваявалі з агульным ворагам у партызанскіх атрадах на Беларускім Палессі і Віцебшчыне", - сказаў Алег Краўчанка.
Ён звярнуў увагу, што дружалюбны характар беларуска-сербскіх адносін пацвярджаецца ў час сустрэч на вышэйшым і высокім узроўнях, а таксама сказаў пра важнасць маючых адбыцца ў гэтым годзе візітаў у Сербію. Намеснік міністра закрануў беларуска-сербскае ўзаемадзеянне ў шматбаковым фармаце, згадаўшы аб тым, што краіны разам працавалі над фарміраваннем Мэт устойлівага развіцця, цесна супрацоўнічаюць па іх дасягненні.
Сербія - буйны гандлёвы партнёр Беларусі на Балканах і адзіная краіна на захадзе ад нашых межаў, з якой у Беларусі дзейнічае пагадненне аб свабодным гандлі і бязвізавы рэжым. "Вынікі нядаўняга пасяджэння міжурадавай гандлёва-эканамічнай камісіі сведчаць аб тым, што ў эканамічных адносінах існуе вялікі нявыкарыстаны патэнцыял. Наша мэта сёння - знайсці дадатковыя магчымасці і стварыць найбольш спрыяльныя ўмовы для паспяховай рэалізацыі гэтага патэнцыялу", - сказаў намеснік кіраўніка знешнепалітычнага ведамства.
У сваю чаргу Надзвычайны і Паўнамоцны Пасол Сербіі ў Беларусі Велька Кавачавіч расказаў пра важнасць Дня дзяржаўнасці для сербскага народа, пра той няпросты шлях, які давялося пераадолець Сербіі на шляху да сваёй незалежнасці. Кіраўнік дыпламатычнай місіі таксама падкрэсліў важнасць развіцця ўсебаковага беларуска-сербскага ўзаемадзеяння.-0-
