22 лістапада, Мінск /Кар. БЕЛТА/. Прадаўжаецца візіт намесніка старшыні Палаты прадстаўнікоў Валерыя Міцкевіча ў Каралеўства Камбоджа. На палях 43-й Генеральнай асамблеі Міжпарламенцкай асамблеі АСЕАН віцэ-спікер правёў шэраг сустрэч з парламентарыямі краін рэгіёна АСЕАН. Аб гэтым БЕЛТА паведамілі ў прэс-службе Палаты прадстаўнікоў.
Сёння адбылася сустрэча Валерыя Міцкевіча са спікерам Парламента Рэспублікі Сінгапур Тан Чуан-Джынам. Намеснік старшыні Палаты прадстаўнікоў адзначыў, што за 30 гадоў з моманту ўстанаўлення дыпламатычных адносін двухбаковае супрацоўніцтва паступальна развіваецца. Бакі выказаліся за далейшае ўзаемадзеянне на парламенцкім узроўні ў мэтах пошуку новых напрамкаў і сумесных ініцыятыў. У якасці першага этапу далейшага ўзаемадзеяння дамовіліся аб правядзенні відэаканферэнцыі на ўзроўні міжпарламенцкіх груп па супрацоўніцтве.
У гэты ж дзень Валерый Міцкевіч правёў сустрэчу з намеснікам старшыні камітэта па міжпарламенцкім супрацоўніцтве Савета народных прадстаўнікоў Рэспублікі Інданезія Путу Супадма Рудана. Бакі адзначылі рэгулярны характар двухбаковых палітычных і міжпарламенцкіх кантактаў, падкрэсліўшы, што парламенцкая дыпламатыя можа зрабіць шмат для ўмацавання сувязей Беларусі і Інданезіі. Была таксама падкрэслена важнасць канструктыўнага ўзаемадзеяння ў Міжпарламенцкай асамблеі АСЕАН і Міжпарламенцкім саюзе.-0-
