18 лютага, Мінск /Кар. БЕЛТА/. Беларусь і Польшча выбралі ў якасці прыярытэту двухбаковых адносін інвестыцыйнае супрацоўніцтва. Аб гэтым 17 лютага ў эфіры тэлеканала АНТ заявіў старшыня Савета Рэспублікі Міхаіл Мясніковіч, падводзячы вынікі візіту беларускай парламенцкай дэлегацыі ў Польшчу, паведамляе БЕЛТА.
На перагаворах з прэм'ер-міністрам Польшчы Матэвушам Маравецкім абмяркоўваліся магчымасці далейшага павелічэння двухбаковага тавараабароту, тэмп росту якога ў 2018 годзе склаў 105,3 працэнта да ўзроўню 2017-га. Бакі прыйшлі да высновы, што падыходы таварнага супрацоўніцтва не маюць вялікіх перспектыў, хоць і гэта важны і патрэбны напрамак. "Прыярытэт развіцця двухбаковых адносін - інвестыцыйнае супрацоўніцтва. Мы абмяркоўвалі вельмі многія праекты і прыйшлі да высновы, што трэба даваць пазітыўны сігнал бізнесу (і ў першую чаргу гэта будзе зроблена польскім бокам), каб прыватныя інвестыцыі больш актыўна заходзілі ў Беларусь", - расказаў Міхаіл Мясніковіч. На сустрэчы закраналіся таксама пытанні ўзаемадзеяння ў электраэнергетыцы. Дасягнута дамоўленасць аб аднаўленні работы групы па супрацоўніцтве ў гэтай сферы.
Міхаіл Мясніковіч у час перагавораў у Варшаве ўзнімаў тэму будаўніцтва ў Польшчы амерыканскай ваеннай базы "Форт Трамп". "Польскі бок даволі канструктыўна рэагаваў і запэўніваў і на ўзроўні міністра замежных спраў, і прэзідэнта, што гэта ні ў якім выпадку не павінна прывесці да нейкай эскалацыі напружанасці. Польскі бок, мяркую, пачуў нашу занепакоенасць. Будуць адпаведныя дыялогі на ўзроўні міністраў абароны і па лініі міністэрстваў замежных спраў", - праінфармаваў старшыня Савета Рэспублікі.
Абмяркоўваліся таксама палітычныя кантакты. "Польскі бок высока цэніць уклад кіраўніцтва Беларусі ў мінскія пагадненні і падкрэслівае, што ў гэтым плане будзе аказвацца садзейнічанне рабоце Беларусі і на міжнародных пляцоўках", - адзначыў спікер.
Асобна Міхаіл Мясніковіч спыніўся на дагаворы аб сацыяльным забеспячэнні, які быў падпісаны ў час візіту дэлегацыі ў Варшаву. Дакумент рэгулюе вельмі многія пытанні: парадак уліку пенсійнага стажу, выплаты дапамог па часовай непрацаздольнасці і гэтак далей. Дагавор спікер назваў вельмі важным, працуючым непасрэдна на патрэбы чалавека.-0-
