14 лютага, Мінск /Кар. БЕЛТА/. Магчымасці пашырэння двухбаковага партнёрства абмеркаваны 13 лютага на сустрэчы старшыні Савета Рэспублікі Міхаіла Мясніковіча з прэзідэнтам Польшчы Анджэем Дудам, паведамілі БЕЛТА ў прэс-службе верхняй палаты парламента.
Прэзідэнт Польшчы падкрэсліў узрастаючы ўзровень беларуска-польскіх кантактаў і іх эфектыўнасць.
У сваю чаргу Міхаіл Мясніковіч прапанаваў фарміраваць парадак дня з перспектывай на будучыню, актывізаваць палітычнае, эканамічнае, гуманітарнае супрацоўніцтва.
Бакі падкрэслілі неабходнасць устанаўлення сістэмных кантактаў на вышэйшым і высокім палітычным узроўнях.
Абмеркаваны падыходы па больш актыўным інвестыцыйным супрацоўніцтве. Бакі адзначылі важнасць дагавора аб сацыяльным забеспячэнні, які падпісаны ў рамках візіту парламенцкай дэлегацыі Беларусі ў Польшчу і рэгулюе ў інтарэсах грамадзян дзвюх краін пытанні пенсійнага забеспячэння, выплат у сувязі з інваліднасцю і часовай непрацаздольнасцю, выплат па беспрацоўі, пенсійнага стажу. Падпісаны дакумент дасць магчымасць забяспечыць належны ўзровень сацыяльнай абароны грамадзян у краінах-партнёрах.
Прэзідэнт Польшчы высока ацаніў намаганні Беларусі па пашырэнні міру і бяспекі ў Еўропе і беларускія ініцыятывы ў цэлым.
Міхаіл Мясніковіч дадаў, што беларускі бок непакояць спробы неаб'ектыўнай ацэнкі некаторых гістарычных фактаў у адносінах да беларусаў Падляшша. Прэзідэнт адзначыў, што да пытанняў, звязаных з гісторыяй, трэба падыходзіць узважана. У кожным канкрэтным выпадку трэба пры неабходнасці разбірацца прадметна.
У час перагавораў было адзначана, што Беларусь і Польшча ў 2019 годзе адзначаюць шэраг юбілейных дат у сумеснай гісторыі: 450 гадоў Люблінскай уніі, 200-годдзе з дня нараджэння Станіслава Манюшкі і іншыя.-0-
