ДЗЯРЖОРГАНЫДЗЯРЖОРГАНЫ
Флаг Нядзеля, 26 верасня 2021
Мінск Ясна +14°C
Усе навіны
Усе навіны
Палітыка
15 чэрвеня 2021, 13:46

Беларусь і Кітай маюць каласальны патэнцыял для ўзаемавыгадных адносін - Макараў

Алег Макараў. Фота з архіва
Алег Макараў. Фота з архіва

15 чэрвеня, Мінск /Кар. БЕЛТА/. Беларусь і Кітай маюць каласальны патэнцыял для ўзаемавыгадных адносін, сумеснага рэагавання на сістэмныя змяненні ў міжнароднай абстаноўцы. Аб гэтым сёння заявіў дырэктар Беларускага інстытута стратэгічных даследаванняў Алег Макараў на міжнароднай анлайн-канферэнцыі "Беларусь і Кітай: агульная траекторыя развіцця", перадае карэспандэнт БЕЛТА.

"Правядзенне такіх канферэнцый стала ўжо традыцыяй. Мы лічым, што такое ўзаемадзеянне трэба выводзіць на ўзровень рэгулярнага, што будзе дапамагаць нам абменьвацца экспертнымі меркаваннямі, заключэннямі. Упэўнены, што непасрэдныя стасункі ўдзельнікаў анлайн-сустрэчы будуць садзейнічаць умацаванню нашых кантактаў, у цэлым развіццю экспертнай дыпламатыі, - падкрэсліў Алег Макараў. - На сённяшні момант элемент экспертнай дыпламатыі набірае сілу, і значнасць "фабрык думкі" ў такім непрадказальным свеце значна ўзрастае. Няма сумненняў, што беларускія і кітайскія "фабрыкі думкі" будуць садзейнічаць пошуку новых кропак росту паміж нашымі краінамі. Выказваем падзяку ўсім нашым кітайскім партнёрам за гатоўнасць развіваць экспертны дыялог".

Паводле яго слоў, вопыт беларуска-кітайскага супрацоўніцтва паказвае, што дзве розныя па маштабах дзяржавы маюць каласальны патэнцыял для ўзаемавыгадных адносін, сумеснага рэагавання на сістэмныя змяненні ў міжнароднай абстаноўцы. "Безумоўным прыярытэтам у супрацоўніцтве паміж нашымі краінамі з'яўляецца хутчэйшае пераадоленне негатыўных наступстваў пандэміі і адаптацыя да новых рэалій адносін паміж дзяржавамі", - сказаў эксперт.

Дырэктар БІСД звярнуў увагу, што канферэнцыя праходзіць у рамках Года рэгіёнаў Беларусі і Кітая, а таксама напярэдадні 30-й гадавіны ўстанаўлення дыпламатычных адносін дзвюх краін. "Напярэдадні 100-годдзя з дня заснавання Камуністычнай партыі Кітая хочацца адзначыць уражальныя вынікі развіцця Кітайскай Народнай Рэспублікі. Па-першае, таму што ў няпростых умовах кіраўніцтву Кітая ўдалося задаволіць асноўныя і сацыяльныя запатрабаванні грамадства, уключаючы ліквідацыю беднасці. Па-другое, кітайская дзяржава нязменна захоўвае сваю сацыяльную накіраванасць і справядлівасць у грамадстве, арыентаванасць на інтарэсы грамадзян", - канстатаваў ён.

Алег Макараў адзначыў, што ў міжнародных адносінах адбыліся значныя трансфармацыі. "З-за пандэміі COVID-19 у значнай меры змяніўся сусветны ландшафт. На сёння свет стаіць перад шэрагам новых выклікаў, такіх як глабальная рэцэсія, процістаянне сусветных цэнтраў сілы. Сітуацыя ў міжнародных адносінах, трэнд на раз'яднанне краін - дэглабалізацыю - патрабуюць сумеснай выпрацоўкі адэкватных рашэнняў і мабілізацыі новых магчымасцей для сумеснага развіцця. І тут у першую чаргу нам трэба зыходзіць з таго, што ў аснове новых адносін павінны быць не толькі прагматычныя элементы выгаднага гандлю, але і элементы падтрымкі, духоўнага адзінства, блізкасці, палітычных ідэалаў, сацыяльных стандартаў", - лічыць дырэктар БІСД.

"Упэўнены, што мы як прадстаўнікі экспертна-аналітычнай супольнасці можам адыгрываць больш важкую ролю ў даследаваннях грамадска-палітычных праблем, фарміраванні прагнозаў і стратэгій, выпрацоўцы практычных прапаноў для асоб, якія прымаюць рашэнні. У беларускай экспертнай супольнасці ёсць жывы інтарэс да вывучэння вопыту Кітая ў розных сферах, - дадаў Алег Макараў. - Што датычыцца БІСД, нас цікавяць пытанні партыйнага будаўніцтва, рэгіянальнага развіцця КНР. Спадзяюся, пасля выхаду нашых краін з абмежавальных мер, выкліканых пандэміяй, мы зможам аднавіць узаемныя візіты, прадоўжыць сустрэчы ў вочным фармаце і ўмацаваць дагаворную аснову нашага супрацоўніцтва".-0-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі