14 красавіка, Мінск /Аліна Грышкевіч - БЕЛТА/. Беларусь і Кітай абмеркавалі ўзаемадзеянне ў барацьбе з COVID-19, паведамілі карэспандэнту БЕЛТА ў беларускім пасольстве ў Пекіне.
"Надзвычайны і Паўнамоцны Пасол Беларусі ў Кітаі Мікалай Снапкоў у фармаце відэаканферэнцыі правёў перагаворы з намеснікам дырэктара пратакольнага дэпартамента МЗС КНР Лі Аньжун, - расказалі ў дыпмісіі. - На сустрэчы бакі абмеркавалі пытанні двухбаковага супрацоўніцтва, асобную ўвагу ўдзялілі ўзаемадзеянню дзвюх краін у барацьбе з COVID-19".
Лі Аньжун высока ацаніла развіццё Кітайска-Беларускага індустрыяльнага парка "Вялікі камень", назваўшы гэты праект узорным. Яна падзякавала беларускаму пасольству за далучэнне да жалобнай акцыі КНР 4 красавіка.
Што датычыцца ўзаемадзеяння Беларусі і Кітая ў пераадоленні COVID-19 Лі Аньжун падкрэсліла: "Праз выпрабаванні вірусам беларуска-кітайскія адносіны выйдуць на зусім новы ўзровень".
У сваю чаргу Мікалай Снапкоў падзякаваў Лі Аньжун за высокую ацэнку супрацоўніцтва Беларусі і Кітая. Ён адзначыў, што гатоўнасць кітайскага боку прадаставіць Беларусі бязвыплатную дапамогу для барацьбы з каранавірусам з'яўляецца яшчэ адным сведчаннем "жалезнага братэрства" паміж дзвюма краінамі.-0-
